(ប៉ៃលិន)នៅ ថ្ងៃទី ១១ ខែ មេសា ឆ្នាំ ២០២១ លោកឧកញ៉ា ឡោ ស៊ុនជាង ប្រធានគណៈកម្មាធិការអនុសាខាស្រុកសាលាក្រៅ បានដឹកនាំ អនុប្រធាន សមាជិក សមាជិកាគណៈកម្មាធិការអនុសាខាស្រុក និងមានការចូលរួមពី ឯកឧត្តម ឌឹន គឹម នាយកប្រតិបត្តិសាខា ក្រុមការងារចុះជួយមូលដ្ឋានបានអញ្ជើញចុះសាកសួរសុខទុក្ខ និងនាំយកអំណោយមនុស្សធម៌ចែកជូនក្រុមគ្រួសារដែលរងគ្រោះដោយសារខ្យល់កន្ត្រាក់ ចំនួន ៤ គ្រួសារ នៅក្នុងភូមិ អូរគន្ធៀងវ៉ា ឃុំស្ទឹងត្រង់ ស្រុកសាលាក្រៅ ខេត្តប៉ៃលិន សំភារៈដែលផ្តល់រួមមានគឺ សង្ក័សីសរុបចំនួន ១១៤ សន្លឹក ជាមួយគ្នានេះក៏បានជូនសម្ភារៈ ក្នុងមួយគ្រួសារទទួលបាន អង្ករ ២៥ គ.ក្រ , មី ១ កេសតូច, ឃីត ១(មុង ១, ក្រមា ១, កន្ទេល ១, សារុង ១) , ទឹកស៉ីអ៉ីវ ៣ ដប , និង ទឹកសុទ្ធវីតាល់ ១ កេស ។
ក្នុងឱកាសចុះសួរសុខទុក្ខនេះ ឯកឧត្តមនាយកសាខា បានពាំនាំប្រសាសន៍ផ្តាំផ្ញើសួរសុខទុក្ខពីសំណាក់ លោកជំទាវបណ្ឌិត បាន ស្រីមុំ ប្រធានគណៈកម្មាធិការសាខា កក្រក ខេត្តប៉ៃលិន ជាពិសេសដោយមានគិតគូរ និង យកចិត្តទុកដាក់ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្ដេចតែងតែគិតគូរសុខទុក្ខបងប្អូនប្រជាពលរដ្ឋក្រីក្រ ដែលមានទុក្ខលំបាក និងជនរងគ្រោះងាយគ្រោះ ដោយមិនប្រកាន់រើសអើងវណ្ណៈ ពូជសាសន៍ ពណ៍សម្បុរ ឬនិន្នាការនយោបាយអ្វីឡើយ។ ឯកឧត្តមបានសំណូមពរអោយបងប្អូនជួសជុស និង សាងសង់ផ្ទះឡើយវិញដោយមានការប្រុងប្រយ័ត្នខ្ពស់ចំពោះគុណភាព និង ទីតាំងដែលត្រូវសាងសង់ ។
លោកឧកញ៉ាប្រធានអនុសាខាស្រុក បានមានមតិណែនាំដល់បងប្អូនយើង សូមមានការប្រុងយ័ត្នអោយបានខ្ពស់ជាងពេលណាៗ និងអប់រំអោយមានការយល់ដឹងអំពីវិធានការការពារខ្លួន ៣ ការពារ ៣ កុំ និង ២ចូលរួម អោយមានការប្រុងប្រយ័ត្នខ្ពស់ ហើយត្រូវឧស្សាហ៍លាងដៃជាមួយ សាប៊ូ អាល់កុលឬ ជែល ពាក់ម៉ាស់ជាប់ជាប្រចាំ រក្សាគម្លាតសុវត្ថិភាពសង្គម និង គម្លាតបុគ្គល ១ម៉ែត្រកន្លះយ៉ាងតិចបំផុតជៀសវាងការជួបជុំដែលមានការប្រមូលផ្តុំមនុស្សច្រើន ជាពិសេសអនុវត្តឲ្យបាននូវអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏ដូចជាសារអប់រំនានារបស់ក្រសួងសុខាភិបាល សំដៅចូលរួមប្រយុទ្ឋប្រឆាំងទប់ស្កាត់ការរីករាលដាលជំងឺកូវីដ 19 កុំអោយមានការបន្តឆ្លងចូលក្នុងសហគមន៍របស់បងប្អូន៕