អភិបាលសាលារាជធានីភ្នំពេញ ឯកឧត្តម ឃួង ស្រេង មានប្រសាសន៍នៅយប់ថ្ងៃទី៩មេសា ម្សិលមិញថា កម្មករ-កម្មការិនី ប្រហែលជា២ពាន់៦រយនាក់ សង្ស័យថា ត្រូវបានឆ្លងកូវីដ១៩ ខណៈថ្ងៃនេះ រកឃើញមានអ្នកឆ្លងសរុបដល់ទៅ៦៣១នាក់ ដែលតួលេខនេះខ្ពស់បំផុត ធ្វើឲ្យរដ្ឋបាលរាជធានីភ្នំពេញព្រួយបារម្ភ ក្នុងការរីករាលដាលបន្តទៀត។
ឯកឧត្តមបន្ថែមថា៖ អញ្ចឹងវិធានការតែមួយគត់ ដែលគេបានប្រើរួចហើយពីអឺរ៉ុប និងបណ្តាប្រទេសមួយចំនួន ដូចជា អូស្ត្រាលី និងហាណូយ គេក៏ធ្វើការបិទជាបន្ទាន់ទើបទប់ស្កាត់កូវីដ-១៩បាន ហើយក៏យើងយកមកអនុវត្តនៅភ្នំពេញ។ ខ្ញុំអំពាវនាវដល់កម្មករ ដែលមិនទាន់យកសំណាកឱ្យក្រុមជំនាញទៅពិនិត្យ គេទៅយកនៅទីតាំងស្នាក់នៅរបស់គាត់តែម្តង ខ្ញុំគិតថា កម្មករប្រហែលជាជិតអស់ហើយ បានយកសំណាកទៅពិនិត្យ ទើបឃើញលទ្ធផលឆ្លងច្រើនតាំងពីថ្ងៃម្សិលមិញមក៕
