លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានប្រកាសតាមសារជាសំឡេងនៅយប់ថ្ងៃទី៧ ខែមេសានេះថា កម្មកររោងចក្រកាត់ដេរ ឌីន ហាន នៅសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ពិតជាមានកម្មករកាត់ដេរ ប្រមាណជិត ៥០នាក់ បានឆ្លងកូវីដ១៩។
អាជ្ញាធរសមត្ថកិច្ច និងក្រុមគ្រូពេទ្យ បានចុះយកសំណាកកម្មករផ្សេងទៀត ទាំងយប់ ថ្ងៃទី៧មេសានេះ នៅក្នុងរោងចក្រផ្ទាល់តែម្តង។ អាជ្ញាធរបានឲ្យដឹងថា រោងចក្រកាត់ដេរ ឌីន ហាន មានកម្មករចំនួន ២៥៦២នាក់។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានអំពាវនាវឲ្យកម្មករកាត់ដេរ នៅរោងចក្រ ឌីន ហាន ស្ថិតនៅផ្លូវឌួងងៀប២ ក្នុងភូមិថ្មី សង្កាត់ស្ទឹងមានជ័យទី៣ ខណ្ឌមានជ័យ ផ្លូវពីមុខទីស្នាក់គណបក្សប្រជាជនកម្ពុជា រាជធានីភ្នំពេញ តាមផ្លូវ២០០៤ ចាក់ទៅផ្លូវវេងស្រេង មកធ្វើតេស្ត រកមេរោគកូវីដ១៩ ទាំងអស់គ្នា។
នៅថ្ងៃទី៧ ខែមេសានេះ សាលារាជធានីភ្នំពេញ បានប្រកាសពីអត្តសញ្ញាណកម្មករកាត់ដេរ នៅរោងចក្រ ឌីន ហាន ចំនួន ១៣នាក់ ដែលរកឃើញឆ្លងកូវីដ១៩ កាលពីថ្ងៃទី៦ ខែមេសា ឆ្នាំ២០២១ ក្នុងចំណោមអ្នកឆ្លងកូវីដ១៩ សរុបនៅភ្នំពេញ ចំនួន ៧៨នាក់៕
