យោងតាមការចុះផ្សាយរបស់កាសែតថៃ Thai BPS បានរាយការណ៍នៅថ្ងៃទី០៧ ខែមេសានេះថា យោធាមីយ៉ាន់ម៉ា បានចេញដីកាចាប់ខ្លួន Miss Grand មីយ៉ាន់ម៉ា ឆ្នាំ២០២០ កញ្ញា Han Lay ក្រោយពីរូបនាងបានថ្លែងសុន្ទរកថាអំពីស្ថានភាពនយោបាយរបស់ប្រទេសមីយ៉ាន់ម៉ាដែលកំពុងចលាចល នៅក្នុងវគ្គផ្តាច់ព្រ័ត្រនៃកម្មវិធីប្រកួត Miss Grand International 2020 នាក្រុងបាងកក កាលពីថ្ងៃទី២៧ ខែមីនា។
Myanmar Celebrity TV Club ដែលជាគេហទំព័រប្រព័ន្ធផ្សព្វផ្សាយដ៏ល្បីល្បាញមួយនៅប្រទេសមីយ៉ាន់ម៉ាបានចុះផ្សាយព័ត៌មានបន្ថែមទៀតថាសមាជិកគ្រួសាររបស់ Han Lay ក៏ត្រូវបានហាមឃាត់មិនឱ្យចាកចេញពីប្រទេសដែរ។
នៅក្នុងការប្រកួត Miss Grand International ឆ្នាំ២០២០ នាង Han Lay បាននិយាយទាំងស្រក់ទឹកភ្នែកនៅពេលដែលនាងបានប្រាប់ពីស្ថានភាពនយោបាយ និងស្វែងរកការគាំទ្រពីអន្តរជាតិសម្រាប់ប្រជាជនមីយ៉ាន់ម៉ាដែលត្រូវក្រុមយោធាសម្លាប់រាប់រយនាក់។
ក្រោយពីចប់ការប្រកួតដើម្បីរក្សាសុវត្ថិភាព Miss grand មីយ៉ាន់ម៉ារូបនេះ ត្រូវបានលោក Nawat Issara Kraisil ជាប្រធាននៃកម្មវិធី Miss grand international ជួយឱ្យរូបនាងស្នាក់នៅប្រទេសថៃយ៉ាងតិច ៣ ខែរហូតដល់ស្ថានការណ៍បានប្រសើរឡើងដោយធ្វើទិដ្ឋាការឱ្យស្នាក់នៅ និងស្វែងរកការងារឱ្យនាងធ្វើនៅប្រទេសថៃ។
សូមរំលឹកផងដែលថាតាំងពីមានបាតុកម្មប្រឆាំងនឹងរដ្ឋប្រហារយោធា មានមនុស្ស ២,៦៥៨ នាក់កំពុងស្ថិតក្នុងការឃុំឃាំង ក្នុងនោះមានអាជ្ញាធរក៏បានចេញដីកាចាប់ខ្លួនចាប់ខ្លួនតារាល្បីៗ ជិត៤០នាក់ ដែលចេញមុខប្រឆាំងនឹងច្បាប់យោធា៕