លោក នូ សុវណ្ណារ៉ា អភិបាលក្រុងតាខ្មៅ បានថ្លែងថា ប្រជាពលរដ្ឋដែលនៅក្នុងបុរី សិរីមង្គល សង្កាត់រការខ្ពស់ ក្រុងតាខ្មៅ ចំនួន២៥៣គ្រួសារ ដែលមានសមាជិកចំនួន ៧៥០នាក់ ត្រូវបានបិទបញ្ចប់ការធ្វើចត្តាឡីស័កហើយ នៅនៅព្រឹកថ្ងៃទី០៦ ខែមេសា ឆ្នាំ២០២១នេះ។
ក្នុងឱកាសនោះដែរ លោក នូ សុវណ្ណារ៉ា បានធ្វើការអំពាវនាវដល់ប្រជាពលរដ្ឋទាំង អស់ បើទោះបីបានបញ្ចប់ការធ្វើចត្តាឡីស័កក៏ដោយ ក៏ត្រូវតែមានការប្រុងប្រយ័ត្នខ្ពស់ ចៀសវាងកុំឱ្យឆ្លងជំងឺដ៏កាចសាហាវនេះ ដោយត្រូវនាំគ្នាបន្តរក្សាអនាម័យឱ្យបានខ្ជាប់ខ្ជួន តាមការណែនាំរបស់ក្រសួងសុខាភិបាល បើមិនមានការចាំបាច់សូមកុំចេញពីផ្ទះ ត្រូវលាង សម្អាតដៃជាមួយសាប៊ូ អាកុល ឬជែល ឱ្យបានញឹកញាប់ ករណីមានបញ្ហាសុខភាពគួរ ឱ្យសង្ស័យត្រូវរាយការណ៍មកអាជ្ញាធរ និងគ្រូពេទ្យជាបន្ទាន់ ជាពិសេសត្រូវអនុវត្តន៍ តាមវិធានការការពាររបស់ សម្តេចតេជោ គឺ ៣កុំ និង ៣ការពារ ឱ្យបានគ្រប់ៗគ្នា។
ជាមួយគ្នានោះដែរ អាជ្ញាធរក្រុងខ្មៅ និងមន្ត្រីពាក់ព័ន្ធក៏បាននាំយកអំណោយរបស់ រដ្ឋបាលខេត្តកណ្តាល ចែលជូនដល់ប្រជាពលរដ្ឋទាំង ៧៥០នាក់ ក្នុងម្នាក់ទទួលបាន សារុង១ ទឹកលាងដៃ ១ដប ម៉ាស ១០បន្ទះ និងថវិកា ៥ម៉ឺនរៀល។
គួររម្លឹកដែរថា ការបិទជាបណ្ដោះអាសន្ន និងដាក់ឱ្យប្រជាពលរដ្ឋទាំងអស់ ក្នុងបុរីនេះធ្វើចត្តាឡីស័កនោះ គឺបន្ទាប់ពីអាជ្ញាធរបានរកឃើញអ្នកវិជ្ជមានមេរោគកូវីដ-១៩ ចំនួន ៧នាក់ កាលពីពេលថ្មីៗកន្លងទៅ៕ ដោយ ណយ នឿន (ប្រភព៖ រដ្ឋបាលបាលខេត្តកណ្តាល)
