ប៉ៃលិន៖ បន្ទាប់ពីបានទទួលដំណឹងថា មានកសិករមួយគ្រួសារ ប្រកបរបរចិញ្ចឹមមាន់ស្រែជាង១០០០ក្បាល នៅក្រោមម្លប់ចំការស្វាយរបស់ខ្លួន ប្រមានជាង៣០០០ដើម នៅលើផ្ទៃដីចំនួន៥ហិកតា ទទួលបានផលលក់ជាបន្តបន្ទាប់ ទើបកាលពីព្រឹកថ្ងៃទី៣១ ខែមីនា ឆ្នាំ២០២១ នេះ លោក សាយ សុផាត ប្រធានមន្ទីរកសិកម្ម និងរុក្ខាប្រម៉ាញ់ខេត្តប៉ៃលិន បានដឹកនាំមន្ត្រីជំនាញ ចុះពិនិត្យទីតាំងចិញ្ចឹមមាន់ ខាងលើ ស្ថិតនៅក្នុងភូមិសួនអំពៅកើត សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ក្នុងការចុះពិនិត្យ និង ណែនាំដល់កសិករឱ្យយល់ដឹងពីរបៀបចិញ្ចឹម និងថែទាំមាន់ស្រែនេះ លោក សាយ សុផាត ប្រធានមន្ទីរកសិកម្ម និង រុក្ខាប្រមាញ់ខេត្តប៉ៃលិន បានរៀបរាប់ឱ្យដឹងថា ៖ ការចិញ្ចឹមសត្វមាន់ស្រែជាលក្ខណ:ធម្មជាតិបែបនេះ គឺល្អម្យ៉ាងដែរ ដោយមានទីធ្លាធំទូលាយ មានខ្យល់អាកាសធាតុល្អ មានស្មៅដុះនៅក្រោមដើមស្វាយ សម្រាប់ងាយស្រួលដល់សត្វមាន់ចឹកស៊ី និងមានសត្វល្អិតជាច្រើន អាចឱ្យមាន់ដើរស៊ីក្នុងបរិវេណចំការ បានយ៉ាងងាយស្រួល និងឆាប់ធំបានលក់ដូរផងដែរ ។
លោកបន្តទៀតថា តែកសិករ ត្រូវយកចិត្តទុកដាក់ថែទាំ ដោយត្រូវរៀបចំនូវចំណីអាហារបែបធម្មជាតិ ដែលមានជីវជាតិល្អ បន្ថែមទៀត សម្រាប់ដាក់ឱ្យសត្វមាន់ស្រែដ៏ច្រើននៅក្នុងដីចម្ការនេះស៊ីដែរ ហើយម្ចាស់ចំការ ត្រូវតែមានថ្នាំសម្រាប់ទម្លាក់សត្វល្អិត ឬថ្នាំបញ្ចុះព្រូនឱ្យមាន់ស៊ីញឹកញាប់ និងថ្នាំព្យាបាលពេលសត្វមាន់មានជម្ងឺផ្តាសាយ ឬជម្ងឺផ្សេងៗ ផងដែរ ។
ម្យ៉ាងវិញទៀត កសិករខាងលើ ក៏ត្រូវចូលរួមជាមួយនឹងបណ្តុំកសិករ ដែលបានចងក្រងជាសហគមន៍រួចហើយ ដើ ម្បីងាយស្រួលរកទីផ្សារលក់ដូរកសិផលរបស់ខ្លួន ព្រោះមាន់ស្រែសព្វថ្ងៃ មានការលក់ដាច់ខ្លាំង ឱ្យតែដឹងពីកន្លែងចិញ្ចឹម បើមានប៉ុន្មានក៏ឈ្មួញទិញយកទៅលក់ដូរបន្តគ្មានសល់នោះឡើយ ។ លើសពីនេះ លោកក៏បានប្រគល់ថ្នាំ សម្រាប់ព្យាបាលមាន់ និងថ្នាំការពារកុំឱ្យមាន់ឈឺមួយចំនួនដែរ ។
ចំណែកកសិករ ឈ្មោះ គង់ ជុំឈឿន ភេទប្រុស អាយុ៣៨ឆ្នាំ រស់នៅភូមិខាងលើ បានរៀប រាប់ឱ្យដឹងដែរថា ៖ លោកបានប្រកបមុខរបរចិញ្ចឹមមាន់ស្រែនៅក្នុងម្លប់ចំការស្វាយនេះ អស់រយ:ពេលជិត១ឆ្នាំមកហើយ ដោយទិញពូជមាន់ទាំងនេះ ពីប្រជាពលរដ្ឋនៅតាមភូមិនានាក្នុងខេត្តប៉ៃ លិន ដោយមុនដំបូង លោកចិញ្ចឹមមេមាន់ប្រមាន៤០ក្បាល ហើយក៏បង្កើតកូន រហូតមកដល់ឥឡូវបានធំជាបន្តបន្ត ក៏បានចាប់លក់ បាន១សារមកហើយ នាឱកាសបុណ្យចូលឆ្នាំចិនកន្លងទៅ ដោយឈ្មួញទិញ ក្នុង១គីឡូក្រាម តម្លៃ១៧,០០០រៀលទៅ១៨,០០០រៀល ។
លោកបន្តទៀតថា ប៉ុន្តែរហូតមកដល់ពេលនេះ ដោយសារតែជំងឺកូវីដ-១៩ កំពុងផ្ទុះឡើង ធ្វើឱ្យតម្លៃទីផ្សារមាន់ស្រែរបស់ខ្លួន មានការធ្លាក់ចុះបន្តិច ដោយ១គីឡូក្រាម ឈ្មួញទិញ ត្រឹមតែ១៥,០០០រៀល ទៅ១៦,០០០រៀលប៉ុណ្ណោះ ។ លោកក៏សំណូមពរឱ្យខាងមន្ទីរកសិកម្ម និងរុក្ខាប្រមាញ់ខេត្តប៉ៃលិន បន្តជួយរកទីផ្សារ និង បង្ហាត់បង្រៀនពីរបៀបចិញ្ចឹមសត្វមាន់ឱ្យបានត្រឹមត្រូវតាមក្បួនកសិកម្ម ព្រោះខាងលោកបានចិញ្ចឹមមាន់ខាងលើ ដោយសារតែសួរមិត្តភក្តិ និងរៀននៅតាមហ្វេសប៊ុក ឬយូធូបប៉ុណ្ណោះ ។
លោកបញ្ជាក់ថា ការចិញ្ចឹមសត្វមាន់ស្រែ នៅក្នុងដីចម្ការបែបនេះ គឺធ្វើរបងលួសហ៊ុព័ទ្ធជុំវិញចម្ការទាំង៥ហិកតាខាងលើ មិនឱ្យសត្វមាន់របស់ខ្លួន ដើរហើរចេញទៅរកស៊ីចំណីខាងក្រៅនោះឡើយ ក្រែងសត្វព្រៃចាប់ ឬអ្នកភូមិចាប់ពេលមាន់ដើរទៅផ្ទះគេជាដើម ។ លោកក៏បានទិញពូជមាន់ប្រភេទសាច់ ឆ្អឹង និងស្បែកខ្មៅ យកទៅដាក់ចិញ្ចឹមក្នុងចម្ការផងដែរ ព្រោះមាន់នេះមានតម្លៃខ្ពស់ ហើយមានរសជាតិឆ្ងាញ់ជាងមាន់ស្រែធម្មតា ៕
