សម្តេចអគ្គមហាពញាចក្រី ហេង សំរិន ប្រធានរដ្ឋសភា បានអំពាវនាវជាថ្មីម្តងទៀតទៅកាន់ពលរដ្ឋដែលជាជនរួមជាតិឱ្យបង្កើនការចូលរួមប្រយុទ្ធប្រឆាំងកូវីដ-១៩ ដោយការទទួលខុសត្រូវខ្ពស់បំផុត ខណៈជំងឺដ៏កាចសាហាវនេះកាន់តែរីករាលដាលធំឡើងពីមួយថ្ងៃទៅមួយថ្ងៃ និងបណ្តាលឱ្យមានមនុស្សស្លាប់ជាបន្តបន្ទាប់។
ថ្លែងក្នុងឱកាសអញ្ជើញទៅទទួលការចាក់វ៉ាក់សាំង ជាលើកទី២ ដើម្បីបង្ការជំងឺកូវីដ-១៩ នៅថ្ងៃទី៣០ ខែមីនានេះ សម្តេចពញាចក្រី ហេង សំរិន បានបង្ហាញការជឿជាក់ថា វ៉ាក់សាំងរួមនឹងការអនុវត្តវិធានការសុខាភិបាលឱ្យបានខ្ជាប់ខ្ជួន គឺជាមធ្យោបាយដ៏សំខាន់ ដែលអាចនាំឱ្យសង្គមជាតិវិលទៅរកសភាពជាធម្មតាដូចមុនវិញបាន។ ប៉ុន្តែក៏ត្រូវការ ការចូលរួមពីពលរដ្ឋក្នុងការអនុវត្តឱ្យបានខ្ជាប់ខ្ជួននូវរាល់វិធានការដែលរាជរដ្ឋាភិបាលបានដាក់ចេញ ជាមួយការទទួលខុសត្រូវខ្ពស់បំផុតចំពោះសុខុមាលភាពសង្គមជាតិរបស់កម្ពុជា។
សម្តេចពញាចក្រី មានប្រសាសន៍ថានៅក្នុងការប្រយុទ្ធប្រឆាំងជំងឺកូវីដ-១៩នេះ រាជរដ្ឋាភិបាលបានចេញនូវវិធានការបន្តបន្ទាប់ ទាំងយន្តការសម្រាប់ស្តារការងើបឡើងវិញនៃសេដ្ឋកិច្ចជាតិ ជីវភាពរស់នៅរបស់ប្រជាជនពលរដ្ឋ និងសុខភាពសាធារណៈ។ នៅក្នុងការទប់ស្កាត់ កុំឱ្យជំងឺកូវីដ-១៩ បន្តរាតត្បាតសុខុមាលភាពសង្គមជាតិទៅមុខទៀត រាជរដ្ឋាភិបាល ក៏បានកំពុងកៀរគរគ្រប់មធ្យោបាយដើម្បីទទួលបានវ៉ាក់សាំងមកចាក់ជូនបងប្អូនប្រជាពលរដ្ឋ ទាំងការទទួលជំនួយពីប្រទេសជាមិត្ត ស្ថាប័នដៃគូអន្តរជាតិ និងការបញ្ជាទិញ។
ក្នុងនាមស្ថាប័ននីតិប្បញ្ញត្តិ សម្តេចពញាចក្រី បានវាយតម្លៃខ្ពស់ចំពោះឆន្ទៈដ៏មុះមុតរបស់រាជរដ្ឋាភិបាលនៅក្នុងគម្រោងការចាក់វ៉ាក់សាំងជូនប្រជាពលរដ្ឋឱ្យបានរហូតដល់ជាង១០លាននាក់ ក្នុងចំណោមប្រជា ពលរដ្ឋទូទាំងប្រទេស។ ជាពិសេសចាប់ពីពេលនេះ បើកយុទ្ធនាការចាក់វ៉ាក់សាំងជូនពលរដ្ឋឱ្យបានយ៉ាងតិច១លានដូស នៅក្នុងមួយខែ ដែលពិតជាមានសារសំខាន់ដើម្បីទប់ស្កាត់ការរីករាលដាលជំងឺកូវីដ-១៩ ប្រកបដោយប្រសិទ្ធភាព និងស្តារសេដ្ឋកិច្ចដែលរងផលប៉ះពាល់ឱ្យងើបឡើងវិញបានឆាប់រហ័ស។
សម្តេចពញាចក្រី បានក្រើនរំឭក ក៏ដូច ជាអំពាវនាវដល់ប្រជាពលរដ្ឋទាំងអស់ចូលរួមទប់ស្កាត់ ការពារជំងឺកូវីដ-១៩ ទាំងអស់គ្នា ដើម្បីបញ្ចៀសការបាត់បង់អាយុជីវិតដោយសារជំងឺរាតត្បាតដ៏កាចសាហាវនេះបន្តទៀត ជាពិសេសដើម្បីជំរុញឱ្យសង្គមជាតិឆាប់មានឱកាសវិលទៅរកជីវភាពដូចធម្មតាវិញ សំដៅស្តារ និង កសាងប្រទេសជាតិឱ្យកាន់តែរីកចម្រើនឆាប់រហ័សឡើង៕