ខេត្តបាត់ដំបង! លោក លឹម ង៉ុយ អាយុ៤៧ឆ្នាំ រស់នៅភូមិអូរខ្ជាយ ឃុំវត្តតាមិម ស្រុកសង្កែ ខេត្តបាត់ដំបង បានអោយអ្នកយកព័ត៌មានយើងដឹងនៅល្ងាចថ្ងៃទី២៩ ខែមីនា ឆ្នាំ២០២១នេះថា ក្រុមគ្រួសាររបស់លោកក្រៅតែពីការម៉ៅក្រូចពោធិ៍សាត់លក់ លោកបានចាប់យករបរឡើងត្នោតយកទឹកលក់ជាង២០ឆ្នាំមកហើយ ដោយមិនបោះបង់ចោលនោះទេបើទោះជាពិបាកបន្តិច ព្រោះវាអាចរកប្រាក់ចំណូលបានគួរសម និងជួយឲ្យជីវភាពគ្រួសារគាត់ប្រសើរឡើងដោយមិនចំណាកស្រុក។
លោកបន្តថា ក្រុមគ្រួសារលោកបានចាប់យករបរឡើងត្នោតជាង២០ឆ្នាំមកនេះដែលសរុបជិត៣០ដើម ដោយជួលពីអ្នកភូមិក្នុងមួយដើមបីម៉ឺនរៀលក្នុងមួយរដូវ និងអាចផលិតទឹកទាំងផ្អែមនិងជូរបានពី ៦០លីត្រទៅ៧០លីត្រក្នុងមួយថ្ងៃមិនទៀងទាត់ទេ ព្រោះខែត្រជាក់ក៏ចេញច្រើន ហើយខែក្តៅក៏ចេញតិច។
ចំពោះទីផ្សារវិញនៅពេលដែលប្រមូលទឹកបានហើយ គ្រួសារលោកបានរៀបចំដាក់លក់នៅនឹងផ្ទះខ្លះ និងមួយចំនួនទៀតដឹកលក់ចែកចាយនៅតាមទីផ្សារ ដែលក្នុងមួយលីត្រលក់បានក្នុងតម្លៃ២០០០រៀល(ពីរពាន់រៀល)ដោយក្នុងមួយថ្ងៃយើងអាចរកប្រាក់ចំណូលបានពីការលក់ទឹកត្នោតជូរ និងផ្អែម បានជាង ១០ម៉ឺនផងដែរ។
ជាចុងក្រោយលោកក៏បានសំណូមពរទៅដល់បងប្អូនទាំងអស់អោយជួយទិញនិងលើកកម្ពស់ផលិតផលកូនខ្មែរយើងផង ព្រោះយើងផលិតចេញពីដើមត្នោតធម្មជាតិពិតៗ មានរសជាតិផ្អែមឈ្ងុយឆ្ងាញ់ ហើយចំពោះអាជូរវិញគឺមិនមានប្រើប្រាស់ដាក់សារធាតុគីមីអ្វីនោះទេគឺយើងគ្រាន់តែដាក់បំបៅមេធម្មជាតិនៅលើដើម ដោយដាក់តែសំបកគគីរនិងសំបកស្តៅតែប៉ុណ្ណោះ។
