ថ្នាំវ៉ាក់សាំងបង្ការជំងឺកូវីដ១៩ ប្រភេទ Sinovac ចំនួន ១,៥ លានដូស ត្រូវបានដឹកតាមយន្តហោះ មកដល់អាកាសយានដ្ឋានអន្តរជាតិភ្នំពេញហើយ នៅម៉ោង ១០ និង ១៥នាទីព្រឹក ថ្ងៃទី២៦ ខែមីនា នេះ។ វ៉ាក់សាំងថ្មីទាំងនេះ ត្រូវបានរាជរដ្ឋាភិបាលកម្ពុជា ទិញពីប្រទេសចិន។
ឯកអគ្គរដ្ឋទូតចិន ប្រចាំកម្ពុជា ឯកឧត្តម វ៉ាង វិនធាន និងឯកឧត្តម វង្សី វិសុទ្ធ រដ្ឋមន្ត្រីប្រតិភូអមនាយករដ្ឋមន្ត្រី និងជាលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ រួមទាំងថ្នាក់ដឹកនាំជាច្រើនទៀត បានអញ្ជើញទៅទទួលវ៉ាក់សាំង ស៊ីណូវ៉ាក់ នៅអាកាសយានដ្ឋានអន្តរជាតិភ្នំពេញ នាព្រឹកថ្ងៃទី២៦ ខែមីនានេះ។
លោកជំទាវ យក់ សម្បត្តិ រដ្ឋលេខាធិការក្រសួងព័ត៌មាន បានប្រាប់ក្រុមអ្នកកាសែតថា រាជរដ្ឋាភិបាលកម្ពុជា បានចំណាយ ១៥លានដុល្លារ ដើម្បីទិញវ៉ាក់សាំង Sinovac ចំនួន ១,៥លានដូសនេះ។ ក្នុង ១ដូស ថ្លៃ ១០ដុល្លារ។
លោកជំទាវ ក៏បានបន្ថែមថា រាជរដ្ឋាភិបាល គ្រោងនឹងទិញវ៉ាក់សាំង Sinovac ចំនួន ៤លានដូស បន្ថែមទៀត៕