យោងតាមសេចក្តីប្រកាសព័ត៌មានរបស់ក្រសួងសុខាភិបាល ដែលបានចេញផ្សាយនៅព្រឹកថ្ងៃទី២៤ ខែមីនា ឆ្នាំ២០២១នេះ បានឲ្យដឹងថា បានរកឃើញអ្នកឆ្លងកូវីដ១៩ ថ្មីចំនួន២៩នាក់ ក្នុងនោះករណីឆ្លងក្នុងសហគមន៍ «ព្រឹត្តិការណ៍២០កុម្ភៈ» ចំនួន២៧នាក់ និង ចំនួន២នាក់ផ្សេងទៀតជាករណីនាំចូល ប៉ុន្តែមានអ្នកជំងឺចំនួន៣៤នាក់បានជាសះស្បើយ និងអនុញ្ញាតឲ្យចេញពីមន្ទីរពេទ្យ ។
ក្នុងចំនួនអ្នកឆ្លងកូវីដ១៩ ថ្មីនេះ គឺពុំមានអ្នករស់នៅក្នុងខេត្តសៀមរាបនោះទេ ប៉ុន្តែពាក់ព័ន្ធនឹងករណីឆ្លងក្នុងសហគមន៍ «ព្រឹត្តិការណ៍២០កុម្ភៈ» សម្រាប់ខេត្តសៀមរាប មានចំនួន០៥នាក់រួចមកហើយ ក្នុងនោះមានស្ត្រីចំនួន០២នាក់ និង កុមារចំនួន ០១ នាក់ ហើយក្នុងចំណោម០៥នាក់នេះ មានម្នាក់ជាស្ត្រី មានទីលំនៅក្នុងស្រុកពួក និង ចំនួន០៤ផ្សេងទៀត មានទីលំនៅក្នុងក្រុងសៀមរាប ។
សូមជម្រាបថា គិតត្រឹមម៉ោង៧ព្រឹកថ្ងៃទី២៤ខែមីនា ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន ១.៨១៧នាក់ ក្នុងនោះអ្នកជាសះស្បើយចំនួន ១.០៣៣នាក់, អ្នកកំពុងសម្រាកព្យាបាលចំនួន ៧៧៧នាក់ និង អ្នកស្លាប់ដោយសារកូវីដ១៩ ចំនួន០៥នាក់ ៕ ដោយ តាំង ហូ