ក្រសួងសុខាភិបាល ប្រកាសថា ការផាកពិន័យលើអ្នកមិនពាក់ម៉ាស់ ត្រូវបានចាប់ផ្តើមអនុវត្តន៍ ពីថ្ងៃចុះហត្ថលេខាទី២៣មីនានេះទៅហើយ តាមច្បាប់បុគ្គលណាមិនពាក់ម៉ាសតាមទីសាធារណៈ ឬកន្លែងជុំគ្នាច្រើន និងមិនរក្សាគម្លាតសង្គម នឹងត្រូវផាកពិន័យប្រាក់ ពី២០ម៉ឺនទៅ១លានរៀល។
រដ្ឋមន្ត្រីក្រសួងសុខាភិបាលកម្ពុជា ឯកឧត្តម ម៉ម ប៊ុនហេង បានចុះហត្ថលេខាលើប្រកាសចំនួន៧ទំព័រ ស្តីពីកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ក្នុងអំឡុងពេលនៃការឆ្លងរាលដាលជំងឺកូវីដ១៩ក្នុងសហគមន៍។ ប្រកាសនេះមាន៧ជំពូក ជំពូកទី១បទប្បញ្ញត្តិទូទៅ ជំពូកទី២បុគ្គលដែលមានកាតព្វកិច្ចពាក់ម៉ាស និងរក្សាគម្លាតសុវត្ថិភាពបុគ្គល ជំពូកទី៣ ទីកន្លែងត្រូវពាក់ម៉ាស់ និងរក្សាគម្លាតសង្គម ជំពូកទី៤ ទីតាំងភូមិសាស្ត្រត្រូវពាក់ម៉ាស់ ជំពូកទី៥ ការអនុវត្តទោសប្បញ្ញតិ្ត ជំពូកទី៦ ការអនុវត្តន៍ដូចគ្នាចំពោះជំងឺឆ្លងកាចសាហាវ និងប្រកបដោយគ្រោះថ្នាក់ និងជំពូកទី៧ អវសានប្បញ្ញត្តិ៕
