រាជធានីភ្នំពេញ៖ លោក ដួង ចាន់សារ៉ាត់ ប្រធានអង្គភាពលូទឹកនៃមន្ទីរសាធារណការ និងដឹកជញ្ជូនរាជធានីភ្នំពេញបានឱ្យដឹងថា ដោយមានការណែនាំនិងចង្អុលបង្ហាញរបស់ឯកឧត្តម ឃួងស្រេង អភិបាលរាជធានីភ្នំពេញ
មន្ទីរសាធារណការនិងដឹកជញ្ជូនរាជធានីភ្នំពេញបានដាក់គ្រឿងចក្រកាយស្តារប្រឡាយទួលពង្រទី១ដែលមានទំហំ៨ ម៉ែត្រ និងជម្រៅ២ម៉ែត្រ មានប្រវែង៦០០០ម៉ែត្រ ចាប់ពីផ្លូវជាតិលេខ៣ដល់ប្រឡាយព្រែកហារ ដោយមានការសហការពីមន្ទីរធនធានទឹកនិងអាជ្ញាធរខណ្ឌពោធិសែនជ័យ ជាលទ្ធផលស្តារបាន៧០% ។
លោកបន្តថា ប្រឡាយនេះមានតួនាទីបង្ហូរទឹក រំដោះទឹកជនន់ពីផ្លូវជាតិលេខ៣ក្នុងភូមិសាស្ត្រខណ្ឌមានជ័យទៅកាន់បឹងជើងឯក និងបន្តហូរទៅកាន់ស្ទឹងជ្រៅនៅពេលគម្រោងការនេះបញ្ចប់អាចកាត់បន្ថយទឹកជំនន់ទឹកភ្លៀងនារដូវវស្សាខាងមុខនេះបានមួយកំរិតធំ៕ ក្រសួងព័ត៌មាន