ខេត្តសៀមរាប៖ អាជ្ញាធរខេត្តសៀមរាបបានអះអាងថា បច្ចុប្បន្ន រដ្ឋបាលខេត្ត បានពិនិត្យឃើញថា មានបងប្អូនប្រជាពលរដ្ឋ មួយចំនួនបានលួចចោះ បំពង់លូទឹកភ្លៀង និងទឹកកខ្វក់ដែលកំពុងស្ថាបនា ក្រោមគម្រោងហេដ្ឋានរចនាសម្ព័ន្ឋផ្លូវ៣៨ខ្សែ ក្នុងក្រុងសៀមរាប ដោយពុំមានការអនុញ្ញាត ពីអាជ្ញាធរមានសមត្ថកិច្ច ខុសលក្ខណៈបច្ចេកទេស ដែលធ្វើឱ្យមានការខូចខាតលូទឹកភ្លៀង និងទឹកកខ្វក់ដែលកំពុងសាងសង់។
រដ្ឋបាលខេត្តសូមជម្រាបថា គឺមិនអនុញ្ញាតិឱ្យមានការតភ្ជាប់ និងលួចតភ្ជាប់ខុសលក្ខណៈបច្ចេកទេសដោយគ្មានការអនុញ្ញាតិពីអាជ្ញាធរមានសមត្ថកិច្ចឡើយ។
ក្នុងករណីរកឃើញមានបងប្អូនប្រជាពលរដ្ឋ ម្ចាស់សណ្ឋាគារ ផ្ទះសំណាក់ ភោជនីយដ្ឋាន ម្ចាស់អាជីវកម្មដ្ឋាននានា លួចចោះភ្ជាប់លូទឹកភ្លៀង និងទឹកកខ្វក់ដែលកំពុងសាងសង់ អ្នកប្រព្រឹត្តនឹងត្រូវទទួលទោសតាមផ្លូវច្បាប់ ជាធរមាន ព្រមទាំងសងរាល់ការខូចខាត ដែលចេញពីសកម្មភាពប្រព្រឹត្តរបស់ខ្លួន៕
