ក្រសួងសុខាភិបាល បានប្រកាសពីការបន្តយន្តការចាក់វ៉ាក់សាំងកូវីដ១៩ សម្រាប់មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋ ពិសេសនៅភ្នំពេញ កណ្តាល និងខេត្តព្រះសីហនុ ដែលកំពុងឆ្លងរាលដាលជំងឺកូវីដ១៩។ នោះគឺវ៉ាក់សាំងកូវីដ១៩ AstraZeneca នឹងត្រូវផ្តល់ជូនជាពិសេសដល់ក្រុមមនុស្ស ដែលងាយរងគ្រោះនឹងជំងឺកូវីដ១៩ មានអាយុចាប់ពី ៦០ឆ្នាំឡើងទៅ។ រីឯវ៉ាក់សាំង Sinopharm សម្រាប់អ្នកមានអាយុចន្លោះពី ១៨-៥៩ឆ្នាំ។
សេចក្តីប្រកាស លើកឡើងថា សម្រាប់ជនបរទេសទាំងអស់ ដែលមានអាយុពី ១៨ឆ្នាំឡើងទៅ និងដែលកំពុងបំពេញបេសកកម្ម ឬកំពុងធ្វើធុរកិច្ច និងកំពុងស្នាក់នៅក្នុងប្រទេសកម្ពុជា ដូចជា មន្ត្រីការទូត មន្ត្រីអង្គការសហប្រជាជាតិ អង្គការ អន្តរជាតិ ស្ថាប័នហិរញ្ញវត្ថុអន្តរជាតិ និងធុរជនជាដើម ដែលមានអាសយដ្ឋានរស់នៅក្នុងកម្ពុជាពិតប្រាកដ សូមអញ្ជើញទៅទទួលការចាក់វ៉ាក់សាំងដោយស្ម័គ្រចិត្ត ដែលអាចជ្រើសរើសទីកន្លែង និងវ៉ាក់សាំងទាំងពីរប្រភេទខាងលើ ដើម្បីចាក់បានដែរ។
ក្រសួងសុខាភិបាល បានកត់សម្គាល់ថា ក្រសួងបានពង្រីកទីតាំងចាក់វ៉ាក់សាំង ដល់គ្រប់រាជធានីខេត្តទាំង ២៥ ទូទាំងប្រទេស និងដើម្បីជំរុញការចាក់វ៉ាក់សាំងឲ្យមានវិសាលភាពកាន់តែទូលំទូលាយ នៅទីតាំងចាក់វ៉ាក់សាំង ដែលមានការអនុញ្ញាតពីក្រសួងរួចហើយនោះ ត្រូវបន្តការងារចាក់វ៉ាក់សាំងជូនប្រជាជនតាមក្រុមមនុស្ស នៅរៀងរាល់ថ្ងៃ ( ទាំងថ្ងៃសៅរ៍ ថ្ងៃអាទិត្យ និងថ្ងៃឈប់សម្រាកផ្លូវការ ) ចាប់ពីម៉ោង ៨ព្រឹក ដល់ម៉ោង ១៧ល្ងាច ( ដោយសម្រាកពិសាអាហារថ្ងៃត្រង់ពីម៉ោង ១២ ដល់ម៉ោង ១៤ )៕
