ខេត្តបាត់ដំបង! ប្រជាពលរដ្ឋប្រមាណ ១១ គ្រួសារ រស់នៅក្នុងភូមិច្រាបក្រសាំង សង្កាត់វត្តគរ ក្រុងបាត់ដំបង បានលើកគ្នាស្នើដល់អាជ្ញាធរក៏ដូចជាថ្នាក់ដឹកនាំខេត្ត ពន្លឿនក្នុងការចុះជួយដោះស្រាយនិងអន្តរាគមន៍រុះរើសំណង់ដែលបង្កផលប៉ះពាល់នៅលើផ្លូវចេញចូលផ្ទះដើម្បីអោយពួកគាត់ងាយស្រួលក្នុងការធ្វើដំណើរ រួមចំណែកកាត់បន្ថយគ្រោះថ្នាក់ចរាចរណ៍ដែលអាចកើតមានជាយថាហេតុ។
ប្រជាពលរដ្ឋបានលើកឡើងអោយអ្នកយកព័ត៌មានយើងដឹងនៅព្រឹកថ្ងៃទី ០៤ ខែមិនា ឆ្នាំ២០២១នេះថា ពួកគាត់ទាំងអស់គ្នាមានការមិនពេញចិត្តចំពោះបុគ្គលឈ្មោះ លី សុផល ដែលបានមកសាងសង់លំនៅដ្ឋានលើចំណីផ្លូវរបស់រដ្ឋ និងលើផ្លូវប្រឡាយរំដោះទឹក នៅចំណុចជាប់របងខាងកើតនៃសាលាបឋមសិក្សា ច្រាបក្រសាំង ហើយមិនត្រឹមតែប៉ុណ្ណោះបានយកសម្ភារៈគ្រឿងម៉ាស៊ីនរថយន្តដាក់រាយប៉ាយតាមដងផ្លូវគ្មានសណ្តាប់ធ្នាប់ ធ្វើអោយផ្លូវរួមតូចចង្អៀត ពិបាកក្នុងការធ្វើដំណើរចេញចូល អាចប្រឈមនិងគ្រោះថ្នាក់ចរាចរណ៍ផងដែរ។
ពួកគាត់បន្តថា រយៈពេលកន្លងមកបុគ្គលឈ្មោះ លី សុផល ដែលជាម្ចាស់សំណង់និងជាទីតាំងកន្លែងជួសជុលរថយន្តខាងលើ លោកធ្លាប់បានទទួលសំណងលើផលប៉ះពាល់ពីរដ្ឋរួចរាល់ហើយ តែមិនព្រមរុះរើចេញនោះទេ ដោយបន្តរស់នៅនិងបំពានលើចំណីដីដែលជាកម្មសិទ្ធរបស់ពួកគាត់ដដែល បើទោះបីជាពួកគាត់ធ្លាប់ប្តឹងអោយអាជ្ញាធរភូមិ សង្កាត់ ចុះមកដោះស្រាយអន្តរាគមន៍ហើយយ៉ាងណាក្តី។
ជុំវិញករណីម្ចាស់លំនៅដ្ឋានដែលបានសំណងហើយមិនព្រមរុះរើចេញពីដីចំណីផ្លូវរបស់រដ្ឋ និងដីម្ចាស់កម្មសិទ្ធខាងលើនេះដែរ លោក សុខ ឈឿក ចៅសង្កាត់វត្តគរ បានប្រាប់អ្នកយកព័ត៌មានយើងតាមរយៈទូរស័ព្ទថា រឿងរើមិនរើវាច្រើនគ្នាហើយ អ្នកខ្លះយកលុយហើយមិនព្រមរើមិនមានតែម្នាក់នឹងទេ ហើយការដោះស្រាយចំពោះមុខ អ្នកណាធ្លាប់នៅកន្លែងណា នៅកន្លែងហ្នឹងជាបណ្តោះអាសន្នទៀតទៅ លោកមិនអាចដេញអោយគេរើរុះបានឡើយ តែត្រូវធ្វើយ៉ាងណាទីមួយកុំអោយប៉ះពាល់ផ្លវទឹកគេ ទីពីរត្រូវរើរុះគ្រឿងរថយន្តចេញពីផ្លូវអោយគេចេញចូលបាន មិនត្រូវទុកគ្រឿងចក្របាំងផ្លូវធ្វើអោយគេពិបាកចេញចូលនិងបាំងចរាចរណ៍ផងដែរ ហើយនៅថ្ងៃច័ន្ទខាងមុខនេះលោកនិងអោយក្រុមការងារចុះទៅរៀបចំធ្វើការងារនេះ។
បើទោះបីយ៉ាងណា ប្រជាពលរដ្ឋនៅតែទទូចសូមអោយអាជ្ញាធរជួយដោះស្រាយអន្តរាគមន៍រុះរើសំណង់លំនៅដ្ឋានខាងលើនេះចេញ ដោយសង្ឃឹមនិងជឿជាក់យ៉ាងមុតមាំថា អាជ្ញាធរពិតជាដោះស្រាយតាមផ្លូវច្បាប់ និងយុត្តិធម៌ជាក់ជាមិនខាន។