បន្ទាប់ពីចាក់វ៉ាក់សាំងកូវីដ១៩ AstraZeneca លើកទី១ ថ្ងៃទី៤ ខែមីនា ឆ្នាំ២០២១ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានយកថ្ងៃនេះ ប្រកាសបើកយុទ្ធនាការចាក់វ៉ាក់សាំងកូវីដ១៩ ជាផ្លូវការ។
មូលហេតុ ត្រូវបានសម្តេចតេជោ ហ៊ុន សែន លើកឡើងថា មកពីកាលពីថ្ងៃទី១០កុម្ភៈ គឺការចាក់វ៉ាក់សាំងកូវីដ១៩ សម្រាប់តែមនុស្សអាយុពី ១៨ឆ្នាំ ដល់ ៥៩ឆ្នាំប៉ុណ្ណោះ។ តែពេលនេះ គឺវ៉ាក់សាំង AstraZeneca សម្រាប់មនុស្សអាយុលើសពី ៥៩ឆ្នាំ ដូច្នេះគ្របដណ្តប់លើមនុស្សទូទៅ។
សម្តេចតេជោ ហ៊ុន សែន បានប្រកាសថា មកដល់ពេលនេះ កម្ពុជាយើង ដំណើរការចាក់វ៉ាក់សាំង Sinopharm ដែលជាជំនួយរបស់ចិន បានជាង ១២៥០០០នាក់ហើយ។
សម្តេចតេជោ ហ៊ុន សែន ក៏បានប្រកាសថា មកដល់ពេលនេះ យើងទទួលបានវ៉ាក់សាំង ២ប្រភេទហើយ គឺ Sinopharm ៦០ម៉ឺនដូសរបស់ចិន ហើយនៅមុនចូលឆ្នាំខ្មែរ ចិននឹងផ្តល់ ៤០ម៉ឺនដូសទៀត។ សម្តេចសង្ឃឹមថា នឹងទទួលបានច្រើនជាងនេះ។ ទី២ គឺវ៉ាក់សាំង AstraZeneca ដែលជាជំនួយរបស់អង្គការសុខភាពពិភពលោក ចំនួន ៣២៤០០០ដូស៕
