ខេត្តបាត់ដំបង! ដោយអនុវត្តតាមគោលនយោបាយឈ្នះៗរបស់សម្តេច អគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី២៦ ខែកុម្ភៈ ឆ្នាំ២០២១នេះ ឯកឧត្តម ណុប ដារ៉ា អភិបាលរង នៃគណៈអភិបាលខេត្តបាត់ដំបង បានដឹកនាំមន្ត្រីជំនាញចុះធ្វើការសម្របសម្រួលបញ្ចប់ទំនាស់ក្រោយភាគីខាងម្ចាស់ផ្ទះដីខាងក្រោយប្តឹងជុំទាស់មិនអោយភាគីខាងម្ចាស់ដីខាងមុខសាងសង់ផ្ទះដែលមានប្លង់កម្មសិទ្ធិកាន់កាប់ត្រឹមត្រូវ។
បញ្ជាក់ថា កាលពីថ្ងៃទី០៨ ខែកុម្ភៈ ឆ្នាំ២០២១កន្លងទៅ ក្រោយពីលោកយាយ សោម សារ៉ែន រស់នៅភូមិបែកចានថ្មី សង្កាត់ព្រែកព្រះស្ដេច ក្រុងបាត់ដំបង បានសាងសង់លំនៅដ្ឋានរឹងមាំនៅលើដីក្នុងរបងដែលមានប្លង់កម្មសិទ្ធិកាន់កាប់ត្រឹមត្រូវ តែត្រូវបានភាគីម្ចាស់ផ្ទះខាងក្រោយជាប់ព្រំដីគ្នា ដែលមានឈ្មោះ ឃុន សេង ប្តឹងជំទាស់មិនអោយសាងសង់ ដោយសំអាងថាភាគីឈ្មោះ សោម សារ៉ែន ដែលបានសាងសង់ផ្ទះសំណង់រឹងគ្មានច្បាប់អនុញ្ញាត ។
ក្រោយមានការប្តឹងជំទាស់ រដ្ឋបាលក្រុងបាត់ដំបង ដែលមានលោក ផេង សិទ្ធី ជាអភិបាលក្រុង បានចេញលិខិតផ្អាកការសាងសង់ជាបណ្ដោះអាសន្ន ដោយយោងអនុក្រិត្យលេខ ៨៦ អនក្រ បក ចុះថ្ងៃទី១៩ ខែធ្នូ ឆ្នាំ១៩៩៧ របស់រាជរដ្ឋាភិបាលកម្ពុជា ស្តីពីលិខិតអនុញ្ញាតសាងសង់ -លិខិតលេខ ១៧២៨ ខបប ចុះថ្ងៃទី ៣០ ខែវិច្ឆិកា ឆ្នាំ២០១៥ របស់សាលាខេត្តបាត់ដំបង ស្តីពីការពង្រឹងការគ្រប់គ្រង ត្រួតពិនិត្យការដ្ឋានសំណង់ ក្នុងភូមិសាស្ត្រ ក្រុង-ស្រុក ខេត្តបាត់ដំបង ដែលស្ថិតនៅក្នុងដែនសមត្ថកិច្ចរបស់រដ្ឋបាលខេត្ត -កិច្ចប្រជុំសម្របសម្រួលដោះស្រាយទំនាស់រវាងឈ្មោះ ឃុន សេង និង សោម សារ៉ែន របស់ក្រុមការងាររដ្ឋបាលក្រុង ថ្ងៃទី០៨ ខែមករា ឆ្នាំ២០២១។
ដោយអនុវត្តតាមគោលនយោបាយឈ្នះៗរបស់សម្តេច អគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី២៦ ខែកុម្ភៈ ឆ្នាំ២០២១នេះ ឯកឧត្តម ណុប ដារ៉ា អភិបាលរង នៃគណៈអភិបាលខេត្តបាត់ដំបង បានដឹកនាំមន្ត្រីជំនាញចុះធ្វើការសម្របសម្រួលបញ្ចប់ទំនាស់ ដែលមានការព្រមព្រៀងពីភាគី ឈ្មោះ ឃុន សេង ជាម្ចាស់ផ្ទះដីខាងក្រោយព្រមអនុញ្ញាតអោយភាគីឈ្មោះ សោម សារ៉ែន សាងសង់បន្ត។
ហើយឯកឧត្តម អភិបាលរងខេត្ត អោយភាគីទាំងសងខាងធ្វើកិច្ចសន្យា និងតម្រូវអោយភាគីឈ្មោះ ឃុន សេង ធ្វើលិខិតដកបណ្ដឹង ហើយអោយភាគីឈ្មោះ សោម សារ៉ែន ធ្វើកិច្ចសន្យា បើសិនជាថ្ងៃក្រោយផ្ទះដែលកំពុងសាងសង់បាក់ស្រុតរលំទៅលើផ្ទះម្ចាស់ខាងក្រោយ ត្រូវទទួលខុសសងគេ ទទួលខុសត្រូវចំពោះមុខច្បាប់ផងដែរ។
ជាចុងក្រោយភាគីទាំងសងខាងព្រមទទួលយកតាមការសម្របសម្រួលរបស់ឯកឧត្តម ដោយគ្មានការបង្ខិតបង្ខំនិងបានចាប់ដៃរាប់អានគ្នា ស្រលាញ់គ្នា និងសន្យាជួយគ្នាក្នុងគ្រាមានអាសន្នទៅតាមការណែនាំរបស់ឯកឧត្តមអភិបាលរងខេត្តផងដែរ៕
