ខេត្តបាត់ដំបង៖ កងកម្លាំងនគរបាល និងអ្នកមានអទិភាពមួយចំនួនជាមន្ត្រីរាជការ ឬបុគ្គលិកពេទ្យនៅក្នុងខេត្តបាត់ដំបង ត្រូវបានក្រុមគ្រូពេទ្យ របស់ក្រសួងសុខាភិបាល ចាប់ផ្ដើមចាក់វ៉ាក់សាំងការពារការឆ្លងជំងឺកូវីដ១៩របស់ក្រុមហ៊ុនស៊ីណូហ្វាម នៃប្រទេសចិន ។
ក្នុងឱកាសទទួលការចាក់វ៉ាក់សាំង នៅព្រឹកថ្ងៃទី២៥ ខែកុម្ភៈ ឆ្នាំ២០២១នេះដែរ លោក សឿម ប៊ុនរិទ្ធ អភិបាលរង និងជាអ្នកនាំពាក្យរដ្ឋបាលខេត្តបាត់ដំបង មានប្រសាសន៍ថា ជាជំហានដំបូងនេះ ក្រសួងសុខាភិបាលបានផ្ដល់នូវវ៉ាក់សាំងចំនួន ៩៦០០ដូស ដល់ខេត្តបាត់ដំបង ដើម្បីចាក់ជូនដល់គណៈអភិបាលខេត្ត ក្រុងស្រុក កងកម្លាំងនគរបាល មន្ត្រីសុខាភិបាល និស្សិតពេទ្យ ដោយការចាក់នេះ គឺធ្វើឡើងដោយគោលការស្ម័គ្រចិត្តមិនបង្ខិតបង្ខំ រួមទាំងការពិនិត្យសួរនាំត្រឹមត្រូវ ។
លោកបានបន្តថា ចាប់ពីការចាក់វ៉ាក់សាំងនេះ មិនទាន់ឃើញមានអ្នកណាម្នាក់មានអាការៈអ្វីគួរឲ្យកត់សម្គាល់នោះទេ ព្រោះអ្នកចាក់សុទ្ធសឹងតែមានលក្ខខណ្ឌនិងគោរពតាមការណែនាំនានារបស់ក្រសួងសុខាភិបាលទើបអនុញ្ញាតឲ្យចាក់ ។
ជាមួយគ្នានេះដែរលោកឧត្តមសេនីយ៍ទោ សាត គឹមសាន្ត ស្នងការនគរបាលខេត្តបាត់ដំបង លើកឡើងថា កម្លាំងនគរបាលខេត្តបាត់ដំបងដែលមានអទិភាព គឺបាននាំគ្នាចាក់វ៉ាក់សាំងការពារជំងឺកូវីដ១៩ តាមការណែនាំរបស់សម្ដេចតេជោនាយករដ្ឋមន្ត្រី និងដោយស្ម័គ្រចិត្ត ឬមានការបង្គាប់បញ្ជាអ្វីពីថ្នាក់ដឹកនាំ ខណៈមន្ត្រីនគរបាលខេត្តដែលបានមកចាក់មានទាំងស្នងការ ស្នងការរង និងនាយការិយាល័យជាដើម ។
គួរបញ្ជាក់ថា សកម្មភាពចាក់វ៉ាក់សាំងនៅខេត្តបាត់ដំបង មាននៅមន្ទីរពេទ្យបង្អែកខេត្ត មន្ទីរពេទ្យបង្អែកស្រុកមោងឫស្សី ស្រុកបវេល ស្រុកថ្មគោល ស្រុកឯកភ្នំ និងស្រុកសំពៅលូន គឺធ្វើចាប់ពីថ្ងៃទី២៥ ខែកុម្ភៈ ឆ្នាំ២០២១នេះតទៅ ៕
