(ភ្នំពេញ)៖ ក្រសួងសុខាភិបាល បានប្រកាសនៅព្រឹកថ្ងៃទី២៥ ខែកុម្ភៈនេះថា នៅទូទាំងប្រទេស រកឃើញអ្នកឆ្លងជំងឺកូវីដ១៩ថ្មី ចំនួន ៦៥នាក់ទៀត។ ក្នុងនោះ ម្នាក់ ជាកងទ័ពមួកខៀវ មកពីអាហ្វ្រិកកណ្តាល ៦នាក់ ជាចិននៅខេត្តព្រះសីហនុ និង ៥៨នាក់ ពាក់ព័ន្ធព្រឹត្តិការណ៍សហគមន៍ ២០កុម្ភៈ។
ក្នុងចំណោមអ្នកទើបរកឃើញឆ្លងកូវីដ១៩ ចំនួន ៥៨នាក់ ជាអ្នករស់នៅក្នុងរាជធានីភ្នំពេញ ពាក់ព័ន្ធនឹងព្រឹត្តិការណ៍ឆ្លងសហគមន៍២០កុម្ភៈ គឺមានចិន ៤១នាក់ ខ្មែរ ៥នាក់ វៀតណាម ៩នាក់ កូរ៉េម្នាក់ ជប៉ុនម្នាក់ និងសិង្ហបុរី ម្នាក់។
ក្រសួងសុខាភិបាល បានប្រកាសថា កាលពីថ្ងៃទី២៤កុម្ភៈ មានអ្នកជាសះស្បើយម្នាក់ ជាស្ត្រីខ្មែរ អាយុ ១៩ឆ្នាំ ស្នាក់នៅចោមចៅ ខណ្ឌពោធិ៍សែនជ័យ រាជធានីភ្នំពេញ ជាអ្នកធ្វើដំណើរមកពីសហរដ្ឋអាមេរិក បានមកដល់កម្ពុជា កាលពីថ្ងៃទី៧ ខែកុម្ភៈ។
គិតមកដល់ព្រឹកថ្ងៃទី២៥ ខែកុម្ភៈនេះ នៅទូទាំងប្រទេស មានអ្នកឆ្លងកូវីដ១៩ សរុបចំនួន ៦៩៧នាក់។ ក្នុងនោះ ៤៧៧នាក់ ត្រូវបានព្យាបាលជាសះស្បើយ និង ២១៧នាក់ កំពុងសម្រាកព្យាបាល៕