រដ្ឋបាលខេត្តកំពង់ស្ពឺ នៅយប់ថ្ងៃទី២៣ ខែកុម្ភៈ ឆ្នាំ២០២១ បានជូនដំណឹងថា ករណីមានរបាយការណ៍សង្ខេបរបស់លោកនាយកសាលា អនុវិទ្យាល័យឆាយឆុប ហើយដោយមានការផ្សព្វផ្សាយព័ត៌មាន នៅតាមបណ្ដាញសង្គមថា មានករណីឆ្លងជំងឺកូវីដ-១៩ ដល់សិស្សនៃអនុវិទ្យាល័យឆាយឆុបនោះ រដ្ឋបាលខេត្តសូមធ្វើការបញ្ជាក់ជូនថា មិនមានករណីឆ្លងជំងឺកូវីដ-១៩នោះទេ។
រដ្ឋបាលខេត្តកំពង់ស្ពឺ បានឲ្យដឹង ថា ករណីនេះ ដោយសារឪពុក ម្ដាយរបស់សិស្សម្នាក់ នៃអនុវិទ្យាល័យឆាយឆុបបានប៉ះពាល់ដោយប្រយោល នៅក្នុងព្រឹត្តិការណ៍សហគមន៍២០កុម្ភៈ គឺមិនមែនប៉ះពាល់ដោយផ្ទាល់ ជាមួយអ្នកឆ្លងជំងឺកូវីដ-១៩នោះឡើយ។ ហេតុនេះ ពួកគាត់ស្ថិតក្នុងចំណោមអ្នកប្រឈមឆ្លងជំងឺទាបបំផុត។
អាជ្ញាធរខេត្តកំពង់ស្ពឺ បានឲ្យដឹងទៀតថា បច្ចុប្បន្នពួកគាត់បាននឹងកំពុង ធ្វើចត្តាឡីស័កនៅមន្ទីរពេទ្យបង្អែកខេត្តកំពង់ស្ពឺ ព្រមទាំងមានការយកចិត្តទុកដាក់ពីក្រុមការងារចត្តាឡីស័ក នៃមន្ទីរសុខាភិបាលខេត្តកំពង់ស្ពឺផងដែរ៕