ខេត្តបាត់ដំបង! នៅថ្ងៃទី ២៣ ខែកុម្ភៈ ឆ្នាំ២០២១នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាបានចាត់ឱ្យក្រុមការងារដឹកនាំដោយឯកឧត្តម ងួន រតនៈ អនុប្រធានកិត្តិយសសាខា និងឯកឧត្តមបណ្ឌិត ប៊ុត គឹមស៊ាន ប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង សហការជាមួយកម្មវិធី «ព័ត៌មានសប្បុរសធម៌» របស់ទូរទស្សន៍ប៊ីធីវី បានចុះសួរសុខទុក្ខនិងនាំយកអំណោយមនុស្សធម៌ផ្តល់ជូនគ្រួសារទុគ៌តចំនួន ៣គ្រួសារ រស់នៅស្រុកគាស់ក្រឡ និងស្រុកមោងឬស្សី នៃខេត្តបាត់ដំបង។
ដែលគ្រួសារនីមួយៗទទួលបាន -អង្ករ ៥០គីឡូក្រាម, -មី ១កេស, -ត្រីខ ១០កំប៉ុង, -ទឹកបរិសុទ្ធ៥កេស, -ឃីត (មុង ភួយ សារុង ក្រមា អាវយឺត) ១កញ្ចប់ និងថវិកា ២០ម៉ឺនរៀល ហើយបន្ថែមពីនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានសម្រេចផ្តល់ផ្ទះមនុស្សធម៌ចំនួន ៣ខ្នងដល់គ្រួសារទុគ៌តទាំង ៣គ្រួសារនេះទៀតផងដែរ។
បន្ទាប់ពីបានផ្តល់អំណោយជូនគ្រួសារខាងលេីនេះរួច ក្រុមការងារសាខាកាកបាទក្រហមកម្ពុជាខេត្ត បានអញ្ជេីញជួបសំណេះសំណាលសួរសុខទុក្ខ និងផ្តល់អំណោយមនុស្សធម៌ជូនដល់លោកយាយលោកតាចំនួន ៤៧គ្រួសារផ្សេងទៀតដែលរស់នៅក្នុងភូមិតាខោ ឃុំព្រះផុស ស្រុកគាស់ក្រឡ, ភូមិអង្គ្រង ឃុំជ្រៃ និងភូមិអ្នកតាទ្វា ឃុំឬស្សីក្រាំង ស្រុកមោងឬស្សី ដែលគ្រួសារនីមួយៗទទួលបាន -អង្ករ ២៥គីឡូក្រាម, -មី ១កេស, -ត្រីខ ១០កំប៉ុង, -ទឹកបរិសុទ្ធ១កេស, -ឃីត (ភួយ សារុង ក្រមា អាវយឺត) ១កញ្ចប់ និងថវិកា ៥ម៉ឺនរៀលផងដែរ។
ក្នុងឱកាសចុះសួរសុខទុក្ខដល់ប្រជាពលរដ្ឋខាងលើ ឯកឧត្តម ងួន រតនៈ និងឯកឧត្តមបណ្ឌិត ប៊ុត គឹមស៊ាន បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ក្តីអាណិតអាសូរ ព្រមជាមួយនឹងការគិតគូរពីសុខភាព និងជីវភាពរស់នៅរបស់ប្រជាពលរដ្ឋទាំងអស់ ជាពិសេសការលេីកទឹកចិត្ត និងផ្តាំផ្ញេីដល់លោកយាយ លោកតា បងប្អូនប្រជាពលរដ្ឋទាំងអស់សូមបន្តប្រឹងប្រែងដេីម្បីជីវភាពរស់នៅបន្តទៀត ហើយត្រូវថែទាំសុខភាពឱ្យបានល្អ រស់នៅមានអនាម័យ និងអនុវត្តឱ្យបានខ្ជាប់ខ្ជួនវិធានការរបស់ក្រសួងសុខាភិបាលដើម្បីទប់ស្កាត់ការរីករាលដាលជំងឺកូវីដ-១៩។
ជាមួយគ្នានេះ ឯកឧត្តម ក៏បានជម្រាបជូនពីស្ថានការណ៍វិវត្តន៍ថ្មីនៃជំងឺកូវីដ-១៩ ក្នុងព្រឹត្តិការណ៍សហគមន៍ ២០ កុម្ភៈ ព្រមទាំងសូមឲ្យបងប្អូនទាំងអស់បន្តចូលរួមទប់ស្កាត់ការរីករាលដាលនៃជំងឺកូវីដ-១៩នេះ តាមរយៈការបន្តអនុវត្តវិធានការរបស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី គឺ ៖ ៣ការពារ (១.ពាក់ម៉ាស់ ២.លាងដៃ ៣.គម្លាតសុវត្ថិភាពសង្គម និងគម្លាតសុវត្ថិភាពបុគ្គល) និង ៣កុំ (១.កុំចូលទៅកន្លែងបិទជិត គ្មានខ្យល់ចេញចូល និងប្រេីម៉ាសុីនត្រជាក់ច្រេីនពេក រកកន្លែងមានខ្យល់ចេញចូល ២.កុំទៅកន្លែងមនុស្សច្រេីនកុះករ ៣.កុំប៉ះពាល់គ្នា កុំចាប់ដៃគ្នា កុំកៀកស្មាគ្នា កុំឱបគ្នាជាដេីម)៕