ក្រសួងសុខាភិបាល បានប្រកាសនៅព្រឹកថ្ងៃទី២២ ខែកុម្ភៈនេះ ពីករណីវិជ្ជមានវីរុសកូវីដ១៩ថ្មី ចំនួន ៣៥ករណី ក្នុងនោះ មាន ៣១នាក់ ជាអ្នកពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ។ ក្នុងចំណោម ៣១នាក់នោះ គឺមានខ្មែរ ១០នាក់ ចិន ២០នាក់ និងកូរ៉េម្នាក់។ ជាសរុប ព្រឹត្តិការណ៍ឆ្លងសហគមន៍២០កុម្ភៈ មានអ្នកឆ្លងកើនដល់ ៧៦នាក់ ( ខ្មែរ ១០នាក់ ចិន ៦៤នាក់ វៀតណាម្នាក់ និងកូរ៉េម្នាក់ )។
ក្រសួងសុខាភិបាល ក៏បានប្រកាសកែតម្រូវចំណុចករណីវិជ្ជមាន ព្រឹត្តិការណ៍សហគមន៍ ២០កុម្ភៈ ដែលបានចេញផ្សាយ កាលពីថ្ងៃទី២១កុម្ភៈ ឆ្នាំ២០២១ សរុបចំនួន ៤៣នាក់ មកចំនួន ៤៥នាក់វិញ។ ក្រសួង ក៏សូមកែតម្រូវព័ត៌មានអ្នកជំងឺ ស្ត្រីជនជាតិឈីលី អាយុ ៣០ឆ្នាំ មានអាសយដ្ឋានស្នាក់នៅរាជធានីភ្នំពេញ ដែលបានចេញផ្សាយ កាលពីថ្ងៃទី១៩កុម្ភៈ មកជាជនជាតិចិនវិញ។
ក្រៅពីអ្នកឆ្លងកូវីដ១៩ ចំនួន ៣១នាក់ ពាក់ព័ន្ធនឹងព្រឹត្តិការណ៍សហគមន៍២០កុម្ភៈ គឺនៅថ្ងៃទី២២កុម្ភៈនេះ ក្រសួងសុខាភិបាល ក៏បានប្រកាសពីករណីវិជ្ជមានកូវីដ១៩ ចំនួន ៤នាក់ទៀត ជាអ្នកដំណើរ ចូលមកកម្ពុជា តាមយន្តហោះ ដែលជាបុរសជនជាតិខ្មែរម្នាក់ បុរសជនជាតិចិន ២នាក់ និងស្ត្រីជនជាតិចិនម្នាក់។
ក្រសួងសុខាភិបាល នៅថ្ងៃនេះ ក៏បានប្រកាសពីករណីជាសះស្បើយពីជំងឺកូវីដ១៩ ចំនួន ២នាក់ ដែលជាអ្នកដំណើរចូលមកកម្ពុជាតាមយន្តហោះ គឺបុរសជនជាតិឥណ្ឌា អាយុ ២៨ឆ្នាំ និងស្ត្រីជនជាតិឥណ្ឌា អាយុ ២២ឆ្នាំ ដែលបានមកដល់កម្ពុជា កាលពីថ្ងៃទី៣ ខែកុម្ភៈ។
ក្រសួងសុខាភិបាល បានប្រកាសថា គិតត្រឹមម៉ោង ៧ព្រឹក ថ្ងៃទី២២ ខែកុម្ភៈ ឆ្នាំ២០២១ នៅទូទាំងប្រទេស រកឃើញអ្នកមានវីរុសកូវីដ១៩ សរុបចំនួន ៥៦៨នាក់។ ក្នុងនោះ ព្រឹត្តិការណ៍សហគមន៍ ២០កុម្ភៈ មានចំនួន ៧៦នាក់។ រីឯអ្នកព្យាបាលជាសះស្បើយ មានចំនួន ៤៧៥នាក់។ ចំណែក ៩៣នាក់ កំពុងសម្រាកព្យាបាល នៅមន្ទីរពេទ្យ៕