(ភ្នំពេញ)៖ ក្នុងពេលថ្លែងសារពិសេសទៅកាន់ជនរួមជាតិ នាព្រឹកថ្ងៃទី២០ ខែកុម្ភៈ ឆ្នាំ២០២១ សម្តេចតេជោ ហ៊ុន សែន បានប្រកាសដាក់បទបញ្ជាជាថ្មី និងប្រកាសពីការបិទតំបន់មួយចំនួន ដែលផ្ទុះការឆ្លងរាលដាលជំងឺកូវីដ១៩ ក្នុងសហគមន៍ ថ្ងៃ២០កុម្ភៈ នៅរាជធានីភ្នំពេញ គឺត្រូវបិទតំបន់មួយចំនួន ដូចជា ក្លិបកម្សាន្ត N8 និង Apartments រួមទាំងផ្ទះ ដែលមានការរស់នៅច្រើន។
សម្តេចតេជោ ហ៊ុន សែន បញ្ជាក់ថា ការបិទតំបន់នោះ គឺមិនអនុញ្ញាតឲ្យចេញចូលទេ។ តែបើអ្នកមានផ្ទះនៅតំបន់នោះ អនុញ្ញាតឲ្យចូល តែមិនឲ្យចេញទេ។ ក្រៅពីនេះ ក៏ត្រូវធ្វើតេស្ត ហើយធ្វើចត្តាឡីស័កឲ្យបានត្រឹមត្រូវ។ ស្វែងរកអ្នកពាក់ព័ន្ធជាមួយនឹងក្លិបកម្សាន្ត N8 ដែលនេះ ជាភារកិច្ចរបស់អាជ្ញាធរ ហើយរកតាមបណ្តាខេត្តផងដែរ។
សូមរម្លឹកថា ព្រឹត្តិការណ៍ឆ្លងកូវីដ១៩ នៅសហគមន៍ ថ្ងៃទី២០កុម្ភៈ ត្រូវបានសម្តេចតេជោ ហ៊ុន សែន ប្រកាសថា ចាប់ពីថ្ងៃទី១៨ ដល់ព្រឹកថ្ងៃទី២០ ខែកុម្ភៈ រកឃើញអ្នកឆ្លងកូវីដ១៩ ដំបូង ចំនួន ៣២នាក់ហើយ។ ការដឹងពីការឆ្លងសហគមន៍នេះ ដោយសារតែអ្នកពាក់ព័ន្ធនឹងក្លិប N8 បានទៅធ្វើតេស្ត រកកូវីដ ដើម្បីចេញទៅក្រៅប្រទេស៕
