ខេត្តព្រះសីហនុៈ វាពិតជាល្អបំផុតសំរាប់ប្រជាជនកម្ពុជា និងសភាពាណិជ្ជកម្មខេត្តព្រះសីហនុ ដែលមានឪកាសជួបពិភាក្សាជាមួយក្រុមហ៊ុនyamoto green farm របស់ជប៉ុន ក្នុងការបើកច្រកកិច្ចសហប្រតិបត្តិការ លើវិស័យកសិកម្ម ផ្នែកដាំបន្លែ ផ្លែឈើ ធម្មជាតិ ពុំមានសារជាតិ និងកសិ ទេសចរណ៍ នេះបើយោងតាមប្រសាសន៏របស់លោក ឧកញ្ញ៉ា វណ្ណ សុខហេង ប្រធានសភាពាណិជ្ជកម្មខេត្តព្រះសីហនុ ថ្លែងនាព្រឹកថ្ងៃទី១៩គុម្ភះឆ្នាំ២០២១នៅការិយាល័យសភាពាណិជ្ជកម្មខេត្តព្រះសីហនុ។
ថ្លែងក្នុងជំនួបនាព្រឹកនោះផងដែរ លោក ឧកញ្ញ៉ា វណ្ណ សុខហេង រួមជាមួយសមាជិកសមាជិកប្រមាណ២០នាក់ បានបង្ហាញការសាទរយ៉ាងកក់ក្តៅចំពោះចំណាប់អារម្មណ៏របស់តំណាងក្រុមហ៊ុនyamoto green Co.ltd របស់ជប៉ុន ក្នុងបើកច្រកនៃកិច្ចសហប្រតិបត្តិការវិនិយោគលើវិស័យកសិកម្ម និង កសិទេសចរ នៅកម្ពុជា ជាពិសេសនៅខេត្តព្រះសីហនុ ដែលជាខេត្តប៉ូលសេដ្ឋកិច្ចដ៏សំខាន់របស់ប្រទេសកម្ពុជា ដែលកិច្ចសហប្រតិបត្តិការណ៏នេះ នឹងធ្វើអោយភាគីនៃប្រទេសទាំងពីរ កម្ពុជា ជប៉ុន កាន់តែមានភាពស្និតស្នាលលើគ្រប់វិស័យ ទាំងវិស័យការទូត និង វិស័យពាណិជ្ជកម្ម។លោកឧកញ្ញ៉ា បានបន្តថា តាមរយះបទពិសោធន៏របស់ក្រុមហ៊ុន yamoto green Co.ltd ដែលជាក្រុមហ៊ុនល្បីឈ្មោះក្នុងប្រទេសជប៉ុននិង ក្នុងប្រទេសជាច្រើនទៀតនោះ នឹងធ្វើប្រជាជនកម្ពុជាទទួលបាននូវបទពិសោធន៏ថ្មី ប្រកបដោយគុណភាព ទាំងលើបច្ចេកទេសដាំដុះ បច្ចេកទេសថែរក្សាគុណភាពបន្លែ បច្ចេកទេសនៃការដឹកជញ្ជូន ដោយផ្នែកលើគុណភាពស្តង់ដាជប៉ុនជាសកល។ការជួបគ្នានាពេលនេះ លោក ឧកញ្ញ៉ា សង្ឃឹមថា នឹងទទួលបានផ្លែផ្កាជាទីគាប់ចិត្ត ហើយក៏ជាការបើកច្រកមួយថ្មីសំរាប់សភាពាណិជ្ជកម្ម នឹងបងប្អូនប្រជាកសិករ កម្ពុជា។
ដោយឡែកលោក Fukada Go តំណាងក្រុមហ៊ុន yamoto green Co.ltd បន្ទាប់ពីធ្វើបទបង្ហាញអំពីគោលបំណងរបស់ក្រុមហ៊ុន នឹង ខ្សែចង្វាក់នៃបច្ចេកទេសដាំបន្លែធម្មជាតិ ពុំមានជាតិគីមី លោកបានបង្ហាញជំហ៊រយ៉ាងមុតមាំថា ជំនួបនាពេលនេះ បើទោះបីជាពុំទាន់ឈានដល់ការចុះព្រមព្រៀងវិនិយោគយ៉ាងណាក៏ដោយ ក៏លោក សង្ឃឹមថា ភាគីទាំងពីរ កម្ពុជា ជប៉ុន រវាងក្រុមហ៊ុន yamoto green Co.ltd និង សភាពាណិជ្ជកម្មខេត្តព្រះសីហនុ សុទ្ឋតែមានគោលដៅនិងឆន្ទះដូចគ្នា ក្នុងចក្ខុវិស័យវែងឆ្ងាយ ឆ្ពោះទៅបង្កើតការដាំដុះដំណាំ បន្លែ ផ្លែឈើ ពុំមានជាតិគីមី ដើម្បីរួមគ្នាកាត់បន្ថយនូវផលប៉ះពាល់ ដែលបណ្តាលមកពីការបរិភោគ បន្លែ ផ្លែឈើ ដែលមានសារៈ ជាតិគីមី ដែលកន្លងបានធ្វើអោយប៉ះពាល់យ៉ាងធ្ងន់ធ្ងរដល់សុខភាព៕