ខេត្តបាត់ដំបង៖ នៅយប់ថ្ងៃពុធទី ១៧ ខែកុម្ភៈ ឆ្នាំ២០២១ វេលាម៉ោង ៧:០០ នាទីយប់នៅផ្លូវលេខ៥៧ក្រវ៉ាត់ក្រុង ភូមិអូរដំបង ឃុំអូរដំង ស្រុកសង្កែ ខេត្តបាត់ដំបង ក្រោមការដឹកនាំរបស់ឯកឧត្តម ណុប ដារ៉ា អភិបាលរងនៃគណៈអភិបាលខេត្តបាត់ដំបង បានរៀបចំកម្លាំងចម្រុះ ទាំងស្នងការនៃស្នងការដ្ឋានខេត្តបាត់ដំបង កងកម្លាំងរាជអាវុធហត្ថនិងក្រសួងសុខាភិបាល ដើម្បីត្រួតពិនិត្យទឹកនោមរកសារធាតុញៀន និងផ្លុំជាតិអាកុល ចំពោះប្រជាពលរដ្ឋដែលបើកបរនូវយានយន្តគ្រប់ប្រភេទ។
បន្ទាប់ពីកងកម្លាំងសមត្ថកិច្ចបានត្រួតពិនិត្យទឹកនោម ហើយបានរកឃើញអ្នកផ្ទុកសារធាតុញៀនជាច្រើននាក់ មានទាំងអ្នកបើករថយន្តក្រុងអ្នកបើកបររថយន្តកង់ 10 និងអ្នកបើករថយន្តធុនតូចផងដែរ។
ក្នុងនោះដែរ ឯកឧត្តម ណុប ដារ៉ាអភិបាលរងនៃគណៈអភិបាលខេត្តបាត់ដំបងបានមានប្រសាសន៍ថា ការធ្វើនេះមិនផ្ដោតតែអ្នកបើកបរនៅរថយន្តតូចឬរថយន្តធំទេសូម្បីតែអ្នកបើកបរនៅម៉ូតូក៏ត្រូវតែត្រួតពិនិត្យនូវសារធាតុញៀននឹងសារធាតុស្រវឹងដែរ ដើម្បីទប់ស្កាត់រាល់ការគ្រោះថ្នាក់ចរាចរណ៍ដែលមានកើតឡើងជារៀងរាល់ថ្ងៃនៅក្នុងប្រទេសកម្ពុជាយើង។
ដោយឡែកស្របតាមប្រមុខរាជរដ្ឋាភិបាលគឺយើងផ្ដោតទៅរករថយន្តដែលបានដឹកនូវកម្មករដែលមានមនុស្សច្រើនក៏យើងត្រូវតែត្រួតពិនិត្យមើលដែរ។
ជាចុងក្រោយឯកឧត្តម ណុប ដារ៉ា លោកបានមានការសំណូមពរដល់បងប្អូនប្រជាពលរដ្ឋសូមឲ្យចូលរួមគោរពច្បាប់ចរាចរណ៍ ដើម្បីជីវិតអ្នកនិងជីវិតអ្នកដ៏ទៃការចូលរួមគោរពច្បាប់ចរាចរណ៍គឺមានភាពទូលំទូលាយណាស់។ហើយក៏សូមសំណូមពរទៅដល់ម្ចាស់ក្រុមហ៊ុនដែលជួលបុគ្គលិកធ្វើការត្រូវត្រួតពិនិត្យទឹកនោមទៅដល់បុគ្គលិករបស់ពួកគាត់ជារៀងរាល់សប្តាហ៍ ដើម្បីទប់ស្កាត់នៅអ្នកសេពគ្រឿងញៀននិងទប់ស្កាត់ការគ្រោះថ្នាក់ចរាចរណ៍ជារៀងរាល់ថ្ងៃលើដងផ្លូវ៕ ប៉ាន ផល្លា