ខេត្តបាត់ដំបង ៖ នៅព្រឹកថ្ងៃទី១៧ ខែកុម្ភៈ ឆ្នាំ២០២១នេះសាខាកាកបាទក្រហមកម្ពុជាខេត្តបាត់ដំបង បានរៀបចំពិធីប្រកាសទទួលស្គាល់ សមាសភាពគណៈកម្មាធិការអនុសាខាស្រុកថ្មគោលចំនួន១២រូប មន្ត្រីប្រចាំការអនុសាខាចំនួន ៣រូប និងក្រុមកាកបាទឃុំទាំង១០សរុប៤០រូប និង អ្នកស្ម័គ្រចិត្តភូមិចំនួន១៤២រូប(៧១ភូមិ)សរុបចំនួន ១៩៧នាក់នៃអនុសាខាកាកបាទក្រហមកម្ពុជាស្រុកថ្មគោល ក្រោមអធិបតីភាព ឯកឧត្តម អ៊ុយ រី អនុប្រធានកិត្តិយសសាខា ឯកឧត្តមបណ្ឌិត ប៊ុត គឹមស៊ាន ប្រធានគណៈកម្មាធិការសាខាកាកបាទក្រហមកម្ពុជាខេត្ត បាត់ដំបង ដោយមានការអញ្ចើញចូលរួមពីសំណាក់ ឯកឧត្តម លោកជំទាវ អនុប្រធាន សមាជិក សមាជិកាគណៈកម្មាធិការសាខា លោក លោកស្រី សមាជិក សមាជិកា ប្រធានកិត្តិយសអនុសាខា គណៈកម្មាធិកាអនុសាខាស្រុក លោកនាយកសាខាខេត្ត ថ្នាក់ដឹកនាំ បុគ្គលិក ក្រុមកាកបា ក្រហមឃុំ និងអ្នកស្ម័គ្រចិត្ត អនុសាខាកាកបាទក្រហមកម្ពុជា ស្រុកថ្មគោល នៃខេត្តបាត់ដំបង។
បន្ទាប់ពីលោក កុសុម សុភីនារ៉ា នាយកសាខា អាននូវសេចក្តីសម្រេចទទួលស្គាល់សមាសភាពគណៈកម្មាធិការអនុសាខាស្រុក មន្ត្រីប្រចាំការអនុសាខា និងក្រុមកាកបាទក្រហមឃុំទាំង១០រួចមកលោកជា សម្បត្តិ ប្រធានគណៈកម្មាធិការអនុសាខាស្រុកថ្មគោល ក្នុងនាមជាប្រធាន អនុប្រធាន និងសមាជិក សមាជិកា អនុសាខា មន្ត្រីប្រចាំការ ក្រុមកាកបាទក្រហមឃុំ បានប្តេជ្ញា រួមគ្នាឆ្លើយតបចំពោះទំនុកចិត្តរបស់គណៈកម្មាធិការសាខា នឹងបន្តយកចិត្តទុកដាក់ប្រតិបត្តិ និងរក្សាខ្ចាប់នូវគោលការណ៍គ្រឹះទាំង៧ប្រការ លក្ខន្តិកៈ សេចក្តីសម្រចនិងការណែនាំរបស់កាកបាទក្រហមកម្ពុជាដើម្បីបំពេញភារកិច្ចឲ្យបានជោគជ័យ ព្រមទាំងរក្សានិងពង្រឹងសាមគ្គីភាពក្នុងជួរគណៈកម្មាធិការអនុសាខាដោយទទួលយកការប្រឹក្សាជាមួយ គណៈកិត្តិយសអនុសាខា និងឯកភាពរួមគ្នាដោះស្រាយបញ្ហាប្រឈម ដោយស្មារតីទទួលខុស ត្រូវខ្ពស់ដើម្បីឆ្លើយតបទៅនឹងទំនុកចិត្ត និងការដឹងគុណដ៏ជ្រាលជ្រៅចំពោះថ្នាក់ដឹកនាំសាខា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នឹងបន្តរួមគ្នា,ពង្រឹងការផ្សព្វផ្សាយ និងចុះពន្យល់ណែនាំដល់ប្រជាពលរដ្ឋនៅតាមមូលដ្ឋានអំពីការថែទាំសុខភាព និងការរក្សាអនាម័យបរិស្ថាន ដើម្បីជៀសវាងនិងទប់ស្កាត់ជំងឺរាតត្បាតផ្សេងៗ ដូចជា COVID-19 និងគ្រុនឈាម គ្រុនឈីក តាមការណែនាំរបស់ក្រសួងសុខាភិបាល ។
មានប្រសាសន៍សំណេះសំណាលក្នុងពិធីនោះ ឯកឧត្តម អ៊ុយ រី និងឯកឧត្តមបណ្ឌិត ប៊ុត គឹមស៊ាន បានសម្តែងនូវមនោសញ្ចេតនាដ៏កក់ក្តៅចំពោះ លោក លោកស្រី គណៈកម្មាធិការអនុសាខា មន្ត្រីប្រចាំការ ក្រុមកាកបាទក្រហមឃុំដែលមានឆន្ទៈចូលរួមចែករំលែកពេលវេលាបំរើក្នុងបុព្វហេតុមនុស្សធម៌ដោយស្ម័គ្រចិត្ត នេះជាកម្លាំងមនុស្សធម៌នៅថ្នាក់មូលដ្ឋានដើម្បីជាសេនាធិការឱ្យសាខាកាកបាទក្រហមកម្ពុជាខេត្ត និងអាជ្ញាធរគ្រប់លំដាប់ថ្នាក់នៅមូល ដ្ឋានអោយទាន់ពេលវេលានិងទទួលបានលទ្ធផលជោគជ័យស្របតាមទិសស្លោក “ ទីណា មានការលំបាក ទីនោះមាន កាកបាទក្រហមកម្ពុជា និង កាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗ គ្នា “ ពិសេសផ្ដាំផ្ញើដល់គណៈកម្មាធិការអនុសាខាស្រុកថ្មគោល និងអ្នកពាក់ព័ន្ធទាំងអស់នូវការងារសំខាន់ៗប្រាំមួយចំណុចបន្ថែមផងដែរ។