ខេត្តបាត់ដំបង ៖ នៅព្រឹកថ្ងៃទី១៧ ខែកុម្ភៈ ឆ្នាំ២០២១នេះ ឯកឧត្តម អ៊ុយ រី អនុប្រធានកិត្កិយសសាខាខេត្ត ឯកឧត្តមបណ្ឌិត ប៊ុត គឹមស៊ាន ប្រធាន គណៈកម្មាធិការសាខា និងសហការី បាននាំយកអំណោយមនុស្សធម៌ទៅចែកជូនគ្រួសារ ប្រជាពលរដ្ឋចំនួន ១៣គ្រួសារដែលរងគ្រោះដោយអគ្គិភ័យកាលពីព្រឹកថ្ងៃទី១៦ ខែកុម្ភៈ ឆ្នាំ២០២១ថ្មីៗបណ្តាលអោយផ្ទះចំនួន០៨ខ្នងឆេះទាំងស្រុង និង០៥ខ្នងរងផលប៉ះពាល់ស្ថិតនៅក្រុមទី ១៦ ភូមិទួលតាឯក សង្កាត់ទួលតាឯក ក្រុងបាត់ដំបង ដែលមិនទាន់ដឹងមូលហេតុនៅឡើយ។
ក្នុងឱកាសនោះ ឯកឧត្តម អ៊ុយ រី អនុប្រធានកិត្តិយសសាខា បានមានមតិសំណេះសំណាលជាមួយគ្រួសាររងគ្រោះ ដោយ បានសំដែងនូវការចូលរួមសោកស្តាយ និងការអាណិតអាសូរចំពោះក្រុមគ្រួសាររងគ្រោះពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូនប្រជាពលរដ្ឋរងគ្រោះ ដែលជានិច្ចកាលសម្ដេចតែងតែគិតគូរពីសុខទុក្ខ និងជំរុញឱ្យមានការដោះស្រាយបញ្ហានានារបស់បងប្អូនប្រជាពលរដ្ឋគ្រប់ពេលវេលា និងគ្រប់ទីកន្លែង ហើយសូមសម្តែងនូវការសោកស្តាយចំពោះការ ខូចខាតទ្រព្យសម្បត្តិ ផ្ទះសម្បែង ដែលមិននឹកស្មានដល់។
ជាមួយគ្នានេះ ឯឧត្តមអនុប្រធានកិត្តិយសសាខា ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ត្រូវមានការប្រុងប្រយ័ត្នជាប់ជានិច្ចចំពោះគ្រោះអគ្គិភ័យ និងគ្រោះធម្មជាតិដែលកើតមានឡើង និងសូមជួយអប់រំកូនចៅឱ្យជៀស ឆ្ងាយពីគ្រឿងញៀន និងប្រុងប្រយ័ត្នខ្ពស់ចំពោះគ្រោះថ្នាក់ចរាចរណ៍ និងត្រូវគោរពច្បាប់ចរាចរណ៍ និងសូមបងប្អូនកុំបាក់ទឹកចិត្ត ខិតខំបង្កបង្កើនផល និងដាំដំណាំរួមផ្សំសម្រាប់ទ្រទ្រង់ជីវភាពនិងបង្កើនសេដ្ឋកិច្ចគ្រួសារឱ្យកាន់តែប្រសើឡើងវិញ និងសូមបងប្អូនទាំងអស់គ្នារត្រូវយកចិត្តទុកដាក់គិតគូរជានិច្ចពីសុខភាព អនាម័យ និងសុវត្ថិភាពផ្ទាល់ខ្លួន តាមរយៈការចូលរួមអនុវត្តវិធានការការពារ និងរក្សាអនាម័យ ជាពិសេសអនុវត្តនូវ អនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា ក៏ដូចជាសារអប់រំនានារបស់ក្រសួងសុខាភិបាល ដើម្បីចូលរួមកាត់បន្ថយនិងបង្ការទប់ស្កាត់ការរីករាលដាលនៃជំងឺកូវីដ-១៩ កំពុងតែកើតមានទ្បើងនៅក្នុងប្រទេសយើង។
អំណោយដែលបានចែកជូននាពេលនេះ ក្នុង០១គ្រួសារៗទទួលបាន -អង្ករ៥០ គីឡូក្រាម,មី០១កេស -ទឹកសុទ្ធ០៥កេស -ឃីត០១កញ្ចប់ (មុង, ភួយ ,ក្រមា,សារុង,អាវ) -ត្រីខ១០កំប៉ុង -ទឹកត្រីទឹកស៊ីអ៊ីវ ១យួរ និងថវិការ២០ម៉ឺនរៀលសម្រាប់គ្រួសារឆេះទាំងស្រុង ដោយឡែកគ្រួសាររងផលប៉ះពាល់ថវិការចំនួន ០៥ម៉ឺនរៀល។
