(ប៉ៃលិន )៖ កាលពីព្រឹកថ្ងៃទី១៥ ខែកុម្ភៈ ឆ្នាំ២០២១ គេសង្កេតឃើញផ្ទាំងប៉ាណូដ៍ធំមួយ របស់ក្រុមហ៊ុន (NNP) របស់លោកស្រី ទ្រី ដាណា ដែលដាក់ពីលើក្បាលទទឹងផ្លូវជាតិលេខ៥៧ ក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន ត្រូវបានអាជ្ញាធរខេត្ត សហការជាមួយនឹងមន្ត្រីជំនាញក្រុងប៉ៃលិន ចុះចុះរុះរើចេញវិញហើយ ដោយសារអះអាងថា មិនទាន់មានការសុំច្បាប់អនុញ្ញាតឲ្យដាក់ត្រឹមត្រូវនៅឡើយទេ ។
ប្រភពព៍ត៍មានបានឱ្យដឹងថា ៖ បន្ទាប់ពីមានការរុះរើផ្ទាំងប៉ាណូចេញវិញនេះ ធ្វើអោយអ្នកប្រើប្រាស់បណ្ដាញសង្គមហ្វេសប៊ុក កំពុងមានការភ្ញាក់ផ្អើល និងងើងឆ្ងល់យ៉ាងខ្លាំង ជាពិសេសអ្នករស់នៅក្នុងក្រុងប៉ៃលិនតែម្តង ដោយបន្ទាប់ពីឃើញសកម្មភាពអាជ្ញាធរ និងមន្ត្រីជំនាញ ចុះទៅធ្វើការរុះរើផ្ទាំងប៉ាណូផ្សាយពាណិជ្ជកម្មរបស់ក្រុមហ៊ុន (NNP) ដ៍ធំចេញពីលើផ្លវនោះ ។
ប្រភពបន្តថា ករណីនេះ មានកាលើកឡើងថា បើមិនទាន់មានច្បាប់អនុញ្ញាតទេ! ហេតុអ្វីក៏ផ្ទាំងប៉ាណូរបស់ក្រុមហ៊ុន ទ្រី ដាណា អាចដំឡើងដាក់ផ្សាយពីលើក្បាលទទឹងផ្លូវសាធារណៈ បានបែបនេះ? ហើយការដាក់តាំងរូបមនុស្សប្រុសឬស្រីក៍ដោយ គឺមិនសមរម្យនោះទេ ព្រោះជាការដាក់នៅពីលើក្បាល ។
ទោះបីយ៉ាងណា ក្រោយពីមានការចែកចាយនៅលើបណ្តាញសង្គមហ្វេសប៊ុករួចមក មានមតិខ្លះលើកឡើងថា «ការរុះរើប៉ាណូខាងលើ ព្រោះមិនទាន់មានច្បាប់អនុញ្ញាតឲ្យដាក់ បែរជាលួចដាក់ស្ងាត់ៗ ដោយគ្មានអាជ្ញាធរជំនាញដឹងឮនោះឡើយ» អ្នកខ្លះ សួរថា លួចដំឡើងយ៉ាងម៉េច? បើផ្ទាំងហ្នឹងមិនមែនតូចឯណា ហើយក៏មិនមែនដំឡើងមួយម៉ោង ពីពីរម៉ោងរួចរាល់ដែរ?
ពាក់ព័ន្ធនឹងបញ្ហានេះលោក យូ ពៅ ប្រធានមន្ទីរព័ត៍មានខេត្ត បានរៀបរាប់ឱ្យដឹងនៅវេលាយប់ថ្ងៃដដែលថា ៖ ការដាក់តម្លើងផ្ទាំងប៉ាណូផ្សាយពាណិជ្ជកម្មរបស់លោកស្រី ទ្រី ដាណា គឺអត់មានច្បាប់ទម្លាប់ត្រឹមត្រូវនោះទេ ហើយពេលអាជ្ញាធរខេត្ត ទាក់ទងតាមលេខទូរស័ព្ទជាច្រើនដង ដើម្បីសួរនាំ អត់មានអ្នកទទួល ។
លោកបានបញ្ជាក់ថា ការដាក់តាំងរូបភាពមនុស្សនៅពីលើក្បាលគឺមិនសមរម្យឡើយ ចុះបើសម្តេច ឬព្រះមហាក្សត្រធ្វើដំណើរតាមរថយន្តនៅលើដងផ្លូវខាងលើ នោះមិនដឹងជាយ៉ាងណានោះទេ ។ លើសពីនេះ បើការដាក់តាំងនៅក្បែរចិញ្ចើមផ្លូវនោះទើបល្អមើលជាង ការដាក់ពីលើក្បាល ៕
