ឥណ្ឌា៖ មនុស្សចំនួន ៩ នាក់ បានស្លាប់ និង១៤០នាក់ទៀតបានបាត់ខ្លួន នៅភាគខាងជើងប្រទេសឥណ្ឌា បន្ទាប់ពីមានការបាក់ផ្ទាំងដីជម្រាលភ្នំហិមាល័យ និងបំផ្លាញទំនប់វារីអគ្គិសនី ដែលបង្កឱ្យមានការជន់លិចយ៉ាងសម្បើមនៅតំបន់នោះ។ នេះបើតាមការចេញផ្សាយដោយសារព័ត៌មាន CNA កាលពីថ្ងៃអាទិត្យម្សិលមិញ។
ហេតុការណ៍នេះបានកើតឡើងដោយសារមានការបាក់ចេញនូវផ្នែកមួយនៃផ្ទាំងជម្រាលភ្នំទៅលើតំបន់ Tapovan នៃរដ្ឋ Uttarakhand ភាគខាងជើង ដោយបណ្តាលឱ្យមានទឹកជំនន់ និងកម្ទេចកម្ទីជាច្រើនបានបាក់ចូលទៅក្នុងទំនប់វារីអគ្គិសនីចំនួន ២ ឆក់យកអាយុជីវិត និងធ្វើឱ្យខូចខាតផ្ទះសម្បែងជាច្រើនផងដែរ។
ដោយឡែក អាជ្ញាធរបានបញ្ជូនក្រុមការងារជួយសង្គ្រោះប្រមាណជា ២,០០០ នាក់ ទៅកន្លែងកើតហេតុដើម្បីបើកប្រតិបត្តិការជួយសង្គ្រោះ ស្វែងរកអ្នកបាត់ខ្លួនផ្សេងៗទៀត ក៏ដូចជាជម្លៀសប្រជាជនចេញពីតំបន់ដែលស្ថិតនៅតាមជ្រលងទន្លេ ដែលអាចប្រឈមនឹងទឹកជំនន់ហូរសង្គ្រុបជាដើម។ ក្នុងនោះអាជ្ញាធរក៏បានបញ្ជាក់ដែរថា មនុស្សយ៉ាងហោចណាស់ ៤២ នាក់ បានជាប់គាំងនៅរូងក្រោមដីនៃស្ថានីយ៍វារីអគ្គីសនី Dhauliganga ហើយ ១៤០ នាក់ទៀតបានបាត់ខ្លួនរកមិនទាន់ឃើញ។ រីឯ ៩ នាក់ទៀត ត្រូវបានរាយការណ៍ថាស្លាប់៕
