មន្ត្រីឧទ្យានុរក្ស សហការជាមួយកំលាំងប្រដាប់អាវុធ ចុះល្បាត និងពិនិត្យមើលទីតាំង ទ្រនំដែលជាទីជម្រក សត្វចង្កៀលខ្យងពងកូន ហើយតំបន់ការពារទេសភាពបឹងព្រែកល្ពៅនេះគឺស្ថិតនៅ ភូមិសាស្ត្រខេត្តតាកែវ ក្នុងស្រុកបូរីជលសារ និងស្រុកកោះអណ្ដែត។ នេះបើតាមការឲ្យដឹងពីមន្ទីរ បរិស្ថានខេត្តតាកែវ នៅថ្ងៃទី៣០ ខែមករា។
សូមជម្រាបថា សត្វចង្កៀលខ្យងត្រូវបានកត់ត្រាមានវត្តមាននៅតំបន់បឹងព្រែកល្ពៅតាំងពីឆ្នាំ ២០០៣ មកម្ល៉េះដែលកាលនោះមានប្រហែលជាង ១០០ ក្បាលប៉ុណ្ណោះ ហើយចំនួនសត្វនេះបាននិងកំពុងកើនឡើងពីមួយឆ្នាំទៅមួយឆ្នាំគួរឲ្យកត់សម្គាល់។
បឹងព្រែកល្ពៅ ជាតំបន់ដីសើមដ៏ធំមួយដែលស្ថិតនៅក្នុងតំបន់ដីសណ្តទន្លេមេគង្គក្រោម និងត្រូវបានកំណត់ជាតំបន់ការពារទេសភាពបឹងព្រែកល្ពៅតាមរយៈអនុក្រឹត្យចុះថ្ងៃទី៩ ខែសីហា ឆ្នាំ២០១៦ ដែលមានភូមិសាស្ត្រក្នុងស្រុកបុរីជលសា និងស្រុកកោះអណ្តែត ខេត្តតាកែវ។ តំបន់ដីសើមនេះមានសារៈសំខាន់ក្នុងការទ្រទ្រង់ ផ្គត់ផ្គង់ និងជាទីជម្រករបស់សត្វស្លាប រុក្ខជាតិ មច្ឆជាតិ និងសត្វព្រៃផ្សេងៗដែលក្នុងនោះមានសត្វ និងរុក្ខជាតិមួយចំនួនមិនទាន់បានកត់ត្រាលម្អិតនៅឡើយទេ៕