ខេត្តបាត់ដំបង! ប្រជាពលរដ្ឋ ជាអ្នកប្រកបរបរដាំដំណាំកសិកម្មបានត្អូញត្អែរពីតម្លៃខាត់ណាផ្កាចុះថោកនៅរដូវដែលកំពុងប្រមូលផល អាចប្រឈមនឹងការខាតបង់មិនមានប្រាក់ចំណេញ។
ប្រជាពលរដ្ឋរស់នៅភូមិអូរស្រឡៅ ឃុំអូរដំបង១ ស្រុកសង្កែ នៃខេត្តបាត់ដំបង បានប្រាប់អ្នកយកព័ត៌មានយើងអោយដឹងនៅរសៀលថ្ងៃទី ២៤ ខែមករា ឆ្នាំ២០២១ ថា គ្រួសារលោកស្រីក្រៅពីការធ្វើស្រែពួកគាត់បានចាប់យកការដាំដំណាំបន្លែលក់ផងដែរ ដែលបច្ចុប្បន្ននេះពួកគាត់បានដាំដំណាំប្រភេទខាត់ណាផ្កា នៅក្នុងទំហំផ្ទៃដី២រ៉ៃស្មើនឹងជិត២ម៉ឺនគុម្ព។
លោកស្រីបានបញ្ជាក់បន្ថែមថា ចំពោះតម្លៃខាត់ណាផ្កាដែលធ្លាក់ថ្លៃនាពេលនេះដោយសារការប្រមូលផលជាន់គ្នា ស្របពេលដែលយើងធ្វើបានគេក៏ធ្វើបាន តែបើសិនជាយើងអាចលក់បានក្នុងតម្លៃ ១គីឡូក្រាមចាប់ពី ១០០០រៀលឡើងទៅ យើងទូទាត់ថ្លៃពូជ ថ្លៃថ្នាំ និងថ្លៃសេវាផ្សេងៗហើយយើងអាចសល់បានតិចតួចដែរ តែបើតម្លៃក្រោមពី ១០០០រៀលក្នុងមួយគីឡូក្រាមយើងប្រឈមនិងការខាតបង់និងមិនមានប្រាក់ចំណេញនោះទេ៕