ព្រះសីហនុ:ស្រុកព្រៃនប់(ព័ត៌មានបឋម) មានករណីគ្រោះថ្នាក់ចរាចរណ៍មួយកើតឡើង រវាងរថយន្តនិងម៉ូតូ បណ្តាលឲ្យបុរសអ្នកបើកបរម៉ូតូស្លាប់យ៉ាងអណោចអធម័ នៅនឹងកន្លែងកើតហេតុ ។
ករណីនេះកើតឡើង នៅវេលាម៉ោង០៩យប់ថ្ងៃទី២២ ខែមករា ឆ្នាំ២០២១ លើកំណាត់ផ្លូវជាតិលេខ៤ ចន្លោះគីឡូម៉ែត្រ១៩៤-១៩៥ ស្ថិតក្នុង ភូមិអូរចំណារ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ។
សមត្ថកិច្ចបញ្ជាក់ថា ម៉ូតូម៉ាក SUZUKI NEX ពណ៌ក្រហម គ្មានស្លាកលេខ មានទិសដៅចេញពីខេត្តព្រះសីហនុ មកដល់ចំណុចកើតហេតុ អ្នកបើកម៉ូតូបានវ៉ាជែង មកខាងឆ្វេងដៃ រួចបុកចូលរថយន្តធំម៉ាក HYUNDAI ពណ៌ស ពាក់ផ្លាកលេខព្រះសីហនុ 3A-6610 ទិសដៅផ្ទុយគ្នា បណ្តាលឲ្យ អ្នកបើកបរម៉ូតូ (មិនទាន់ស្គាល់ឈ្មោះ) ស្លាប់នៅនឹងកន្លែងកើតហេតុ ។
បច្ចុប្បន្នសាកសពកំពុងស្រាវជ្រាវរកក្រុមគ្រួសារយកទៅធ្វើបុណ្យតាមប្រពៃណីយ៍ រីឯវត្ថុតាងរថយន្ត និងម៉ូតូ យកមករក្សាទុកនៅអធិការដ្ឋាននគរបាលស្រុកព្រៃនប់ ។ ដោយឡែកអ្នកបើកបររថយន្ត(មិនទាន់ស្គាល់ឈ្មោះ) បានរត់គេចខ្លួនបាត់ក្រោយពេលកើតហេតុ ៕
