ខេត្តបាត់ដំបង! សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅព្រឹកថ្ងៃទី២០ ខែមករា ឆ្នាំ២០២១នេះ សម្តេចបានអញ្ជើញប្រគល់សញ្ញាបត្រ ជូនដល់និស្សិតសាកលវិទ្យាល័យជាតិបាត់ដំបង ចំនួន២០២៣នាក់ ដែលក្នុងនោះមានបរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់។
ឆ្លៀតក្នុងឱកាសនោះឯកឧត្តម សុខ ឃន សាកលវិទ្យាធិការ នៃសាកលវិទ្យាល័យបាត់ដំបង បានមានប្រសាសន៍ថា ចាប់តាំងពីឆ្នាំ២០០៨មក មានអតីតនិស្សិតជាង២ម៉ឺននាក់ជាធនធានសំខាន់ក្នងការចូលរួមអភិវឌ្ឍន៍សង្គម និងសេដ្ឋកិច្ចជាតិ ក្នុងស្ថាប័នសាធារណៈ និងឯកជនជាង៩០ភាគរយក្នងវិស័យសំខាន់ដូចជា សេដ្ឋកិច្ច ពាណិជ្ជកម្ម កសិកម្ម ជីវចម្រុះ ទេសចរណ៍ ធនាគារ បដិសណ្ឋារកិច្ច និងវិស័យសំណង់ជាដើម ខណៈនៅថ្ងៃនេះសាកលវិទ្យាល័យផ្ដល់សញ្ញាបត្រជូននិស្សិតជ័យលាភីចំនួន២០២៣នាក់ ស្រី១០៥០នាក់ ក្នុងនោះនិស្សិតបរិញ្ញាបត្ររង១៣១នាក់ បរិញ្ញាបត្រ១៧៤៩នាក់ និងបរិញ្ញាបត្រជាន់ខ្ពស់១៤៣នាក់។
ជាមួយគ្នានេះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានមានប្រសាន៍ថា សាកលវិទ្យាល័យជាតិបាត់ដំបង ធ្លាប់មានឈ្មោះល្បីតាំងពីមុនសម័យសង្គ្រាមមកម្លេះ ហើយក្រោយពីបញ្ចប់ភ្លើងសង្គ្រាម រាជរដ្ឋាភិបាលបានរៀបចំដំណើរការសាកលវិទ្យាល័យនេះឡើងវិញ ដោយដាក់ជាសាលាសាកលវិទ្យាល័យជាតិគ្រប់គ្រង រហូតមានការកែសម្រួលបន្តបន្ទាប់។
ហើយក្នុងនោះសម្ដេចក្រឡាហោម ស ខេង ក៏បានសម្ដែងការកោតសរសើរ និងវាយតម្លៃខ្ពស់ចំពោះក្រសួងអប់រំ យុវជន និងកីឡា ដែលបានខិតខំធ្វើកំណែទម្រង់វិស័យអប់រំឱ្យទទួលបានលទ្ធផលល្អជាបន្តបន្ទាប់ ក្នុងនោះក៏មានការរៀបចំកែសម្រួលថ្នាក់ដឹកនាំសាកលវិទ្យាល័យជាតិបាត់ដំបង ដើម្បីធ្វើឱ្យសាកលវិទ្យាល័យកាន់តែមានកិត្យានុភាព និងការជឿទុកចិត្តពីមជ្ឈដ្ឋានជាតិ និងអន្តរជាតិ។
សម្ដេចឧបនាយករដ្ឋមន្ត្រី បានបន្តទៀតថា និស្សិតដែលមានឱកាសសិក្សា និងលោកគ្រូអ្នកគ្រូដែលមានឱកាសបង្រៀននៅទីនេះ គឺដោយសារតែប្រទេសជាតិមានសន្តិភាពពិតប្រាកដនៅឆ្នាំ១៩៩៨ ក្រោមការដឹកនាំរបស់រាជរដ្ឋាភិបាលដែលមានសម្ដេចតេជោជាប្រមុខ បន្ទាប់ពីបានឆ្លងកាត់សង្គ្រាមកាប់សម្លាប់អស់រយៈពេលជាច្រើនឆ្នាំ ហើយសម្ដេចបានចាត់ទុកសន្តិភាព ស្ថិរភាពនយោបាយ ស្ថិរភាពសង្គម សេដ្ឋកិច្ច សន្តិសុខ និងការអភិវឌ្ឍជាតិដែលកម្ពុជាកំពុងមានសព្វថ្ងៃនេះ ថាជាទ្រព្យសម្បត្តិមហាសាលដែលត្រូវរួមគ្នាថែរក្សា ៕