អាមេរិក៖ ប្រធានាធិបតីអាមេរិកជិតផុតអាណត្តិលោក ដូណាល់ ត្រាំ បានថ្លែងសុន្ទរកថាលាជាលើកចុងក្រោយ មុនពេលចុះចេញពីតំណែង នៅថ្ងៃអង្គារនេះ ដោយបានធ្វើការជំរុញអោយមានការបួងសួងដល់រដ្ឋបាលថ្មីរបស់ប្រធានាធិបតីជាប់ឆ្នោតអាមេរិកលោក ចូ បៃដិន ប៉ុន្តែលោក ត្រាំ នៅតែមិនទាន់ទទួលយកទាំងស្រុងនោះទេ នូវលទ្ធផលនៃការបោះឆ្នោតកាលពីខែវិច្ឆិកាឆ្នាំមុន ដែលលោកបានចាញ់លោក បៃដិន ។
នៅក្នុងវីដេអូថ្លែងសារលាជាលើកចុងក្រោយខាងលើនេះ លោក ដូណាល់ ត្រាំ បាននិយាយថា យើងបានធ្វើអ្វីដែលយើងចូលមកដើម្បីធ្វើ និងអ្វីៗជាច្រើនទៀត... ខ្ញុំបានចូលរួមក្នុងសមរភូមិដ៏ស្វិតស្វាញ ដែលជាការប្រយុទ្ធដ៏លំបាកបំផុត ពីព្រោះនោះជាអ្វីដែលអ្នកបានជ្រើសរើសខ្ញុំអោយធ្វើ ។
លោក ដូណាល់ ត្រាំ បាននិយាយនៅក្នុងវីដេអូរបស់លោកទៀតថា អំពើហិង្សានយោបាយ គឺជាការវាយប្រហារទៅលើអ្វីគ្រប់យ៉ាងដែលយើងស្រឡាញ់ក្នុងនាមជាជនជាតិអាមេរិក... វាមិនអាចអត់ឱនបានទេ ។ ជុំវិញបញ្ហាសេដ្ឋកិច្ចវិញ លោក ត្រាំ បាននិយាយថា រដ្ឋបាលរបស់លោកបានកសាងសេដ្ឋកិច្ចដ៏អស្ចារ្យបំផុតនៅក្នុងប្រវត្តិសាស្ត្រពិភពលោក ៕
