ដើមឈើធំៗចំនួន៣ដើម ក្នុងចំណោមដើមឈើប្រមាណ៥០ដើម ដែលមានអាយុកាលប្រមាណ៣០០ឆ្នាំ នៅលើសួនកាណាឌីយ៉ា មុខមន្ទីរពេទ្យព្រះអង្គឌួង ស្ថិតក្នុងខណ្ឌដូនពេញ ដែលគ្រោងកាប់ចេញ ត្រូវបានអភិបាលរាជធានីភ្នំពេញ ឱ្យរក្សាទុកដដែល និងរកវិធីដើម្បីកុំឱ្យដួលបង្កគ្រោះថ្នាក់ដល់ប្រជាពលរដ្ឋ។
ការសម្រេចបែបនេះ បានធ្វើឡើង ខណៈដែល ឯកឧត្តម ឃួង ស្រេង អភិបាលរាជធានីភ្នំពេញ បានដឹកនាំមន្ត្រីជំនាញ និងអាជ្ញាធរខណ្ឌចុះពិនិត្យមើលស្ថានភាពដើមឈើទាំងបីដើម នាព្រឹកថ្ងៃទី១២ ខែមករា ឆ្នាំ២០២១នេះ ។
ក្នុងដំណើរចុះពិនិត្យ ឯកឧត្តម ឃួង ស្រេង បានមានប្រសាសន៍បញ្ជាក់ថា ដើមឈើទាំងបីដើមនេះ មិនត្រូវបានកាប់ចេញនោះទេ ដោយសារវាអាចនៅបន្តឈរទៀតបាន តែលោកបានបញ្ជាឲ្យមន្ទីរបរិស្ថាន មន្ទីរកសិកម្ម និងមន្ទីរសាធារណការ និងដឹកជញ្ជូនរាជធានីភ្នំពេញ សហការគ្នាមើលថែ ដោយលះមែក ឬកាត់មែកដែលស្អុយចេញ ចំណែកដើមឈើទាំងមូលត្រូវធ្វើជើងទម្រទប់ដើម ដើម្បីកុំឱ្យដួលរំលំបង្កគ្រោះថ្នាក់ដល់ប្រជាពលរដ្ឋ៕
