នាយករដ្ឋមន្ត្រីនៃប្រទេសសិង្ហបុរី លោក លី សៀនឡុង បានចាក់វ៉ាក់សាំងប្រឆាំងជំងឺកូវីដ១៩ហើយ នាថ្ងៃសុក្រទី ៨ មករា ២០២១នេះ ជាវ៉ាក់សាំងរបស់ក្រុមហ៊ុនអាមេរិក អាល្លឺម៉ង់ Pfizer- BioNTech។
លោកបានក្លាយជាសមាជិកគណៈរដ្ឋមន្ត្រីដំបូងរបស់សិង្ហបុរី ដែលទទួលការចាក់វ៉ាក់សាំង ដោយលោកបានទទួលវ៉ាក់សាំង ក្នុងយុទ្ធនាការផ្តល់វ៉ាក់សាំងដល់បុគ្គលិកសុខាភិបាល។
លោក លីបាននិយាយថា លោករីករាយក្នុងការឃើញពីការចាប់ផ្តើមផ្តល់វ៉ាក់សាំងដល់មន្ត្រីសុខាភិបាលជួរមុខនេះ។
«ដូច្នេះ ខ្ញុំឆ្លៀតឳកាសនេះ ចាក់ខ្លួនឯងដែរ ហើយពេលនេះ ខ្ញុំចាក់រួចហើយ ៣០នាទីក្រោយមក ពុំមានអ្វីមិនស្រួលសម្រាប់ខ្ញុំទេ»។
លោកនាយករដ្ឋមន្ត្រីបន្ថែមទៀតថា លោកនឹងចាក់ម្តងទៀត ប្រមាណ៣សប្តាហ៍ក្រោយទៀត ហើយថា ពុំមានការឈឺចាប់ទេ តែមានសារៈសំខាន់៕