ខេត្តបាត់ដំបង៖ ក្រោយជួបគ្រោះទឹកជំនន់ធ្វើអោយបន្លែមួយចំនួនរងការខូចខាត និងមួយចំនួនទៀតតម្លៃហក់ឡើងខ្ពស់ខ្លាំងដោយមិនធ្លាប់មាន ដែលពេលនេះប្រជាកសិករកំពុងបន្តការដាំដុះឡើងវិញ ដើម្បីឆ្លើយតបតម្រូវការទីផ្សារ និងអ្នកប្រើប្រាស់ នេះបើតាមការលើកឡើងរបស់លោក អុិន សុវណ្ណមុនី ដែលជាអនុប្រធានមន្ទីរកសិកម្មរុក្ខាប្រមាញ់ និងនេសាទខេត្តបាត់ដំបង។
លោកអនុប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានលើកឡើងទៀតថា ការដាំបន្លែក្នុងខេត្តបាត់ដំបង មានទាំងការដាំនៅទីវាល និងនៅក្នុងរោងសំណាញ់ ពិសេសក្នុងអំឡុងនៃវិបត្តិកូវីដ១៩ ក៏ដូចជាកាស្ដារការដាំដុះឡើងវិញ បន្ទាប់ពីទឹកជំនន់ដ៏ធំបានស្រកពលរដ្ឋបាននាំគ្នាដាំបន្លែកំពុងរីកដុះដាលខ្លាំង ហើយក្នុងចំណោមកសិករដាំបន្លែនេះ ពួកគាត់មួយចំនួនក៏បានទទួលពូជបន្លែពីរាជរដ្ឋាភិបាល និងដៃគូអភិវឌ្ឍនានា។
លោក អនុប្រធានមន្ទីរ បានឲ្យដឹងទៀតថា ជាមួយគ្នានេះដែរមន្ទីរកំពុងជំរុញនៅក្នុងការយកផលិតផលរបស់គាត់ទៅវិភាគ ថាតើកាកសំណល់គីមីឬមួយក៏ការងារដែលប្រតិបត្តិការមួយចំនួនដែលគាត់ធ្វើនៅក្នុងកសិដ្ឋានហ្នឹងសមស្របឬណត់ ហើយត្រូវជាមួយស្តង់ដាររបស់ក្រសួងកសិកម្មហ្គេមនឹងអត់ ហើយក្នុងនោះក្រសួងកសិកម្មក៏កំពុងរៀបចំពួកគាត់ឲ្យក្លាយខ្លួនទៅជាម្ចាស់កសិដ្ឋានហ្គេមតែម្ដង និងផ្ដល់វិញ្ញាបនបត្រហ្គេមទៅដល់កសិករដើលគំរូផងដែរ។
ដោយឡែកពលរដ្ឋរស់នៅក្នុងឃុំកំពង់ព្រៀង ស្រុកសង្កែ បានលើកឡើងថា តំបន់ពួកគាត់រស់នៅក៏បានជួបនូវបញ្ហាទឹកជំនន់កាលពីចុងឆ្នាំ២០២០កន្លងទៅផងដែរ បង្កឲ្យលិចលង់ផ្ទះ ដំណាំស្រូវ រួមទាំងដំណាំរួមផ្សំផ្សេងៗ ដែលបញ្ហានេះធ្វើឲ្យពួកគាត់ជួបនូវការលំបាកក្នុងគ្រួសារ តែយ៉ាងណាក្រោយទឹកជំនន់ទៅពួកគាត់ក៏បានទទួលនូវស្រូវពូជពីសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីស្ដារការធ្វើស្រែឡើងវិញ រួមទាំងការដាំបន្លែសុវត្ថិភាពដែលអាចរកប្រាក់ចំណូលបន្ថែមទៀត សម្រាប់ផ្គត់ផ្គង់គ្រួសារ ។