ខេត្តប៉ៃលិន ៖ ប្រជាកសិករមួយគ្រួសារ រស់នៅជាប់នឹងជាងភ្នំខៀវ បានប្រកបមុខរបរចិញ្ចឹមសត្វកង្កែបអូប ជិត១០០០ក្បាល ដើម្បីលក់បានថវិកា សម្រាប់ផ្គត់ផ្គង់ជីវភាពប្រចាំថ្ងៃ ។ ទោះបីជាការចិញ្ចឹមសត្វកង្កែបនេះ មានការលំបាកបន្តិច ក៏គាត់នៅតែមិនបោះបង់ចោលមុខរបរមួយនេះដែរ ហើយថែមទាំងខិតខំប្រឹងប្រែងថែទាំង នឹងពង្រីកបន្ថែមទៀតនៅថ្ងៃខាងមុខផងដែរ ។
ជាក់ស្តែងកាលពីថ្ងៃទី០៤ ខែមករា ឆ្នាំ២០២១ កសិករម្នាក់ ឈ្មោះ ជា សុវណ្ណា ភេទប្រុស អាយុ៦៩ឆ្នាំ ប្រពន្ធ ឈ្មោះ សោម ស៊ុន អាយុ៦៧ឆ្នាំ រស់នៅក្នុងភូមិអូរច្រាលិច សង្កាត់បរយ៉ាខា ក្រុងប៉ៃលិន ខេត្តប៉ៃលិន បានចិញ្ចឹមកង្កែបអូប និងទុកពូជបង្កាត់ជាច្រើនក្បាល ។
តាមការរៀបរាប់ពីបុរស ឈ្មោះ ជា សុវណ្ណ បានឱ្យភ្នាក់ងារយើងដឹងទាំងទឹកមុខញញឹម ថា ៖ គាត់បានប្រកបមុខរបរចិញ្ចឹមសត្វកង្កែបអូបនេះលក់ អស់រយ:ពេលជាង១ឆ្នាំមកហើយ ដោយបានថវិកាសម្រាប់ផ្គត់ផ្គង់ជីវភាពបន្តិចម្តងៗ មុនដំបូង គាត់បានទិញពូជមកពីខេត្តបន្ទាយមានជ័យ ក៏ទទួលបានការបង្ហាត់បង្រៀនពីគ្រូមកពីខាងមន្ទីរកសិកម្ម សហការជាមួយនឹងអង្គការក្រៅរដ្ឋាភិបាលមួយក្រុម ។
គាត់បន្តទៀតថា ការចិញ្ចឹមសត្វកង្កែបអូបនេះ ត្រូវមានការយកចិត្តទុកដាក់ខ្ពស់ ដោយថែទាំ ទាំងយប់ ទាំងថ្ងៃមិនសូវហ៊ានដើរទៅណាឆ្ងាយឡើយ ហើយក៏បានចាប់លក់ដូរឱ្យឈ្មួញទិញយកទៅធ្វើម្ហូប អាហារនៅក្នុងក្រុងប៉ៃលិន ដោយសត្វកង្កែប៣ទៅ៤ក្បាល ទម្ងន់១គីឡូក្រាម ។ លើសពីនេះ សត្វកង្កែប គឺជាសត្វ ដែលត្រូវការកន្លែងច្រើន ដូចជាកន្លែងបង្កាត់ពូជ កន្លែងភ្ញាស់កូនក្អុកជាដើម ព្រោះវាជាសត្វដែលខាំគ្នា ស៊ីគ្នាជាអាហារមិនស្គាល់មេ ឬកូននោះឡើយ និងមានការងាប់ បើសិនជាយើងមិនប្រុងប្រយ័ត្ន ។
ជាញឹកញយ ពេលឮសម្លេងពួកវាយំនៅក្នុងទ្រុង គឺពួកវាកំពុងតែខាំគ្នា ទើបគាត់ងើបបំបែកចេញ បើមិនដូច្នោះទេ អាចនឹងបណ្តាលឱ្យក្លាយទៅជាដំបៅ បាក់ដៃ បាក់ជើង ខូចខាតអស់ច្រើន ។ គាត់ក៏ចេះថ្នាំព្យាបាលសត្វកង្កែបផងដែរ ដោយលាយទឹកអំបិលជះពីលើសត្វកង្កែបនៅក្នុងទ្រុង និងលាងទ្រុងដោយទឹកអំបិលជាដើម ។ គាត់ចិញ្ចឹមសត្វកង្កែបនេះ ដោយដាក់ចំណី ដែលទិញពីក្នុងផ្សារដាក់ឱ្យស៊ីរហូតដល់ចាប់លក់ ក្នុង១ការ៉ុងតម្លៃ៧៥០០០រៀល ។ ហើយការដាក់ចំណី គឺចាប់តាំងពីតូច រហូតដល់ជាង២ខែ ទើបអាចចាប់លក់ឱ្យឈ្មួញ ទិញយកទៅធ្វើម្ហូបជាដើម ។
គាត់បញ្ជាក់ថា រហូតមកដល់ពេលនេះ សត្វកង្កែបនៅក្នុងទ្រុងក្បែរផ្ទះរបស់គាត់ មានផ្សេងៗ ពីគ្នា កង្កែបខ្លះទើបនឹងធំ ខ្លះទៀតជិតចាប់លក់ និងមានមេកង្កែប និងបាកង្កែប ដែលគាត់រក្សាទុកក្នុងទ្រុងផ្សេង សម្រាប់បង្កាត់ពូជជាដើម ។ នៅថ្ងៃខាងមុខ គាត់នឹងពង្រីកមុខរបរមួយនេះ ឱ្យកាន់តែធំជាងមុន បើសិនជាបោះបង់ចោល អាចនឹងខាតដើមខាតចុង ព្រោះគ្រួសាររបស់គាត់បានខិតខំចំណាយដើមទុនអស់ច្រើនទម្រាំនឹងចេះពីរបៀបចិញ្ចឹមសត្វកង្កែបនេះ ។ ហើយសព្វថ្ងៃនេះ គាត់បានទុកមេកង្កែបអូបចំនួន៣០ក្បាល និងបាកង្កែប៣០ក្បាលដូចគ្នា ដើម្បីបង្កាត់ពូជ ព្រោះកង្កែបឈ្មោល១ក្បាល បង្កាត់ពូជជាមួយមេកង្កែបបានតែ១ក្បាលប៉ុណ្ណោះ ។
គាត់បន្ថែមទៀតថា ដោយសារដីនៅលើជើងភ្នំខៀវ មានភាពធំទូលាយ គាត់ក៏នឹងរៀបចំចិញ្ចឹមសត្វមាន់ស្រែ ដើម្បីលក់យកថវិកាចិញ្ចឹមគ្រួសាបន្ថែមទៀត ព្រោះឥឡូវនេះ គាត់ក៏មានចិញ្ចឹមសត្វមាន់ជារបៀបគ្រួសាររាប់រយក្បាល ដោយព្រលែងឱ្យដើររកស៊ីចំណីនៅតាមព្រៃភ្នំ ។ តែសំ ណាងល្អ អត់សូវមានសត្វស្កា ឬសត្វព្រៃចាប់ស៊ីប៉ុន្មាននោះដែរ ៕
