កម្ពុជាបាននាំចេញអង្ករ និងស្រូវក្នុងបរិមាណសរុបជាង ៣,៥៨ លានតោនដែលមានតម្លៃជាង ១,២៦ ពាន់លានដុល្លារ នៅឆ្នាំ ២០២០ ក្នុងនោះអង្ករត្រូវបាននាំចេញជាផ្លូវការទៅប្រទេសចំនួន ៦០ ខណៈការនាំចេញស្រូវត្រូវបានធ្វើឡើងសម្រាប់ប្រទេសជិតខាង ជាពិសេសប្រទេសវៀតណាម។
ក្រសួងកសិកម្ម រុក្ខាប្រមាញ់ និងនេសាទលោក ឯកឧត្តម វេង សាខុន បានឱ្យដឹងថា ក្នុងឆ្នាំ ២០២០ កម្ពុជាបាននាំចេញអង្ករសរុប ៦៩០ ៨២៩ តោន ដោយមានតម្លៃជិត ៥៣៩ លានដុល្លារ កើនឡើង ១១,៤០ ភាគរយ បើធៀបនឹងឆ្នាំ ២០១៩ ។
ឯកឧតុ្តម សាខុន បានបន្ថែមថា ក្រុមហ៊ុនកម្ពុជាចំនួន ៧៦ បាននាំចេញទៅកាន់ទីផ្សារអន្តរជាតិចំនួន ៦០ ប្រទេសនៅក្នុងឆ្នាំ ២០២០ ដោយប្រទេសចិនឈរនៅលំដាប់ទី ១ ជាប្រទេសនាំចូលអង្ករពីកម្ពុជាក្នុងបរិមាណ ២៨៩ ៤៣៩ តោនស្មើ ៤១,៩ ភាគរយនៃការនាំចេញអង្ករសរុប។ រីឯទីផ្សារសហភាពអឺរ៉ុបឈរនៅលំដាប់ទី ២ ដោយមានបរិមាណ ២០៣ ៧៩១ តោនស្មើនឹង ២៩,៥០ ភាគយ។
ប្រទេស ៦ ក្នុងតំបន់អាស៊ានក៏បាននាំអង្ករពីកម្ពុជាចំនួន ៨៦ ៨៩៩ តោនដែលស្មើនឹង ១២, ៥៨ ភាគរយ ហើយក្រៅពីនោះមានប្រទេស ២៩ ផ្សេងទៀតនៅតំបន់ផ្សេងៗក៏បានរួមចំណែកនាំចូលអង្ករពីកម្ពុជាចំនួន ១១០ ៧០០ តោនស្មើនឹង ១៦,០២ ភាគរយ៕
