ប្រមុខរាជរដ្ឋាភិបាលបានបញ្ជាក់ថា កម្ពុជាមានសាច់ប្រាក់សុទ្ធក្នុងដៃប្រមាណ ១៣លានលានរៀល ទុនបម្រុងអន្តរជាតិជាង ២០ពាន់លានដុល្លារ និងមាសជាង ៤៤តោន សម្រាប់ទុកបំពេញតម្រូវការ សេដ្ឋកិច្ចជាតិ។
សម្តេចតេជោហ៊ុនសែននាយករដ្ឋមន្ត្រីព្រះរាជាណាចក្រកម្ពុជា បានថ្លែងដូច្នេះ ដើម្បីឆ្លើយតបទៅ នឹងមជ្ឈដ្ឋានមួយចំនួន ជាពិសេសក្រុមប្រឆាំងនៅក្រៅច្បាប់ បានលើកឡើងថា រាជរដ្ឋាភិបាលកម្ពុជា ក្រោមការដឹកនាំរបស់សម្ដេចតេជោ ហ៊ុន សែន រៃអង្គាសលុយដើម្បី បើកប្រាក់ខែឱ្យមន្ត្រីរាជការ ។ក្នុងឱកាសថ្លែងសារពិសេសពាក់ព័ន្ធព្រឹត្តិការណ៍សហគមន៍ ២៨ វិច្ឆិកា និងសមិទ្ធផលកើតពីនយោបាយ ឈ្នះ-ឈ្នះនៅថ្ងៃទី២៩ ខែធ្នូ ឆ្នាំ២០២០ ចេញពីភូមិគ្រឹះសម្តេច នាក្រុងតាខ្មៅ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា គិតត្រឹមម៉ោង ៥ ថ្ងៃទី ២៨ ខែ ធ្នូ កម្ពុជាមានសាច់ប្រាក់សុទ្ធកាន់ក្នុងដៃ ដែលទុកនៅរតនាគារជាតិ ប្រមាណ ១៣លានលានរៀល ស្មើនឹង(ប្រមាណ ៣ពាន់លានដុល្លារ) និងមានទុនបម្រុងអន្តរជាតិជាង ២០ពាន់លានដុល្លារ ក្នុងនោះក៏មានមាស ៤៤តោន ៤រយគីឡូក្រាមផងដែរ ។
សម្តេចតេជោ បន្តថា ចំពោះទុនបម្រុងអន្តរជាតិគឺជារបាយការណ៍ទើបចេញកាលពីថ្ងៃទី២៥ ធ្នូទេ ទុនបម្រុងផ្លូវការរបស់ប្រទេសកម្ពុជា មានជាង ២០ពាន់លានដុល្លារ ក្នុងនោះក៏មានមាស ៤៤តោន៤រយគីឡូក្រាមផងដែរ ជាកេរ្តិ៍មរតករបស់ព្រះករុណាព្រះបរមរតនកោដ្ឋ។
សម្ដេចតេជោបានបញ្ជាក់ថា ចំពោះមាសទាំង ៤៤តោន ៤រយគីឡូក្រាមនេះ មានតម្កល់នៅប្រទេសស្វីសចំនួន ១២តោន ៤រយគីឡូក្រាម ជាមរតករបស់ព្រះបរមរតនកោដ្ឋបន្សល់ទុកតាំងពីសម័យសង្គមរាស្ត្រ និយម,តម្កល់ទុកនៅធនាគារ កណ្ដាលអង់គ្លេស ១៧តោនទើបតែទិញថ្មី និងចំនួន ១៥តោន តម្កល់ទុកនៅធនាគារជាតិកម្ពុជា ។
«អ្នកខ្លះថារដ្ឋាភិបាលហ៊ុនសែនចង់អស់លុយបើកប្រាក់ខែ ទៅប្រមូល រៃអង្គាសលុយមកបើកប្រាក់ខែ ប៉ុន្តែខ្ញុំសូមបញ្ជាក់ បើគិតត្រឹមម៉ោង៥ ពីម្សិលមិញ ជាសាច់ប្រាក់នៅក្នុងរតនាគារតែម្ដង គឺមាន១២ លានលាន ៩សែន ៩ម៉ឺន៩ពាន់រៀល នេះលេខ៩ រហូត និយាយទៅ១៣លានលាន រៀល ក្នុង១លានលាន ស្មើនឹង២៥០ លានដុល្លារ អ៊ឺចឹង ១០ លានលាន ស្មើនឹង២៥០០លាន ខេត្តមួយនោះនៅសល់២ពាន់លានទៀត មាស៥តោនទៀត ដូច្នេះវា៣ពាន់លានអត់ទាន់ស្រកស្រុតទេអាពៅ ផ្តាំពីចម្ងាយទៅ ។
បន្ថែមលើនោះប្រាប់ឱ្យអស់ឱ្យហើយទៅកុំឱ្យវាពិបាកទៅសួរអ្នកណាទៅសួរទៅ សូមបញ្ជាក់អានេះជាសាច់ប្រាក់សន្សំ មិនមែនតួលេខទេគឺសាច់ប្រាក់តែម្ដង តែទុនបម្រុងអន្តរជាតិមានមួយផ្សេងទៀត ដែលខ្ញុំប្រាប់តួលេខឱ្យបានភ្លឺភ្នែក នេះគឺរបាយការណ៍ថ្ងៃទី២៥ ខែធ្នូ ឆ្នាំ២០២០នេះទេ ទុនបម្រុងផ្លូវការរបស់ប្រទេសកម្ពុជាមានជាង២០ពាន់លានដុល្លារ ក្នុងនោះ ក៏មានបរិមាណមាស ៤៤តោន៤រយគីឡូក្រាម ហើយឱ្យគេសរសេរសំបុត្រទៅរកទៅ ជាកេរ្តិ៍មរតករបស់ព្រះករុណាបិតា នៅប្រទេសស្វីសចំនួន១២តោន៤រយគីឡូក្រាម ជាមរតករបស់ព្រះករុណាបិតាព្រះអង្គរក្សាទុក តម្កល់នៅទីនោះ ជាកេរ្តិ៍សល់តាំងពីសង្គមរាស្ត្រនិយម » ៕
