ខេត្តបាត់ដំបង! សហគមន៍អេកូទេសចរណ៍ទឹកធ្លាក់អូរជាំ គឺជាតំបន់ទេសចរណ៍ធម្មជាតិដ៏មានសក្តានុពលមួយដែលមានចំងាយប្រមាណ១០០ គីឡូម៉ែត្រពីក្រុងបាត់ដំបង ដែលមានទីតាំងស្ថិតនៅក្នុងភូមិអូរជាំលើ ឃុំកំពង់ល្ពៅ ស្រុកសំឡូត ខេត្តបាត់ដំបង ។
បើតាមការបញ្ជាក់ពីមន្ទីរទេសចរណ៍ខេត្តបានអោយដឹងថា សហគមន៍អេកូទេសចរណ៍ (ទឹកធ្លាក់អូរជាំ)គឺជាតំបន់ទេសចរណ៍មួយដែលសំបូរទៅដោយដើមឈើធំៗចម្រុះ ផ្តល់នូវម្លប់យ៉ាងត្រជាក់ និងខ្យល់អាកាសបរិសុទ្ធល្អ និងមានទឹកធ្លាក់ចុះមកពីលើភ្នំដែលមានប្រភពមកពីបឹងដ៏ធំមួយទំហំប្រមាណជាង២ហិចតា លើកំពូលភ្នំដែលអ្នកនៅតំបន់នោះហៅថាបឹងទន្លេផែន ហូរកាត់តាមផ្ទាំងថ្មធំៗជាច្រើនដំណាក់ ដែលបង្កើតអោយទឹកមានសភាពថ្លាឆ្វង់ និងត្រជាក់ដូចទឹកអម្រិត។
ទីតាំងដ៏អំនោយផលនេះ បានផ្តល់នូវបរិស្ថានដ៏ប្រសើរចំពោះការរស់នៅរបស់មច្ឆា បក្សាបក្សី ប្លែកៗគួរជាទីគយគន់ និងមានទីភ្នំខ្ពស់ៗអមដោយរុក្ខជាតិនិងស្មៅដុះខៀវខ្ចី បានបង្កើននូវថាមពលដល់ភ្ញៀវទេសចរដែលទៅកម្សាន្តសប្បាយ និងផ្តល់នូវសេវាកម្មដល់ភ្ញៀវទេសចរជាច្រើនដូចជា: -សេវាស្នាក់នៅ -សេវាម្ហូបអាហារនិងភេសជ្ជៈ -និងសេវាមគ្គុទេសក៍ទេសចរណ៍សហគមន៍ផងដែរ។
លោក ម៉េង ជាំង អ្នកគ្រប់គ្រងសហគមន៍អេកូទេសចរណ៍ទឹកធ្លាក់អូរជាំបានបញ្ជាក់អោយដឹងថា តំបន់អេកូទេសចរណ៍ទឹកធ្លាក់អូរជាំមានសេវាកម្មជាច្រើនសម្រាប់ភ្ញៀវដូចជា
- ការដើរទស្សនាកម្សាន្តតាមលើភ្នំ និងទឹកជ្រោះដែលមានច្រើនដំណាក់ផ្តល់នូវរសជាតិអារម្មណ៍ប្លែកៗពីគ្នា
- ការងូតទឹកជ្រោះកម្សាន្ត
- ការពិសារអាហារប្លែកៗក្នុងតំបន់ ដែលចំអិនដោយប្រើប្រាស់វត្ថុធាតុដើមនៅក្នុងសហគមន៍ផ្ទាល់
- ការបោះតង់ស្នាក់នៅប្រកបដោយសុវត្ថិភាពខ្ពស់
- ការទស្សនាហ្វូងមេអំបៅ
- ការកម្សាន្តពេលរាត្រីដោយដុតភ្នក់ភ្លើងជាក្រុមៗ
- ការសិក្សាស្រាវជ្រាវ ស្វែងយល់ ពីសហគមន៍
- ការទទួលបាននូវបទពិសោធន៍ថ្មីប្លែក ជាមួយនឹងធម្មជាតិនៃបេះដូងរបស់ស្រុកសំឡូត។