ផលនេសាទប្រមូលបាន ក្នុងឆ្នាំ ២០២០ នេះ ត្រូវរំពឹងថា នឹងមានចំនួនជាង ៩៣ ម៉ឺនតោន កើនប្រមាណ ៣ ភាគរយ បើធៀបនឹងរយៈពេលដូចគ្នាឆ្នាំ ២០១៩ ក្នុងនោះផលពីវារីវប្បកម្មមានកំណើនជាង ៣០ ភាគរយ។ នេះបើយោងតាមទិន្នន័យពីរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ។
ក្នុងពេលចុះទៅពិនិត្យសកម្មភាពនៃការទិញត្រីធ្វើផ្អក ប្រហុក ត្រីងៀត និងត្រីឆ្អើរនៅក្នុងស្រុកពញាឮ ខេត្តកណ្តាល កាលពីពេលថ្មីៗនេះ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បាននិយាយថា ផលនេសាទសរុបក្នុងឆ្នាំ ២០២០ នេះ នឹងមានកំណើនតិចតួចធៀបនឹងឆ្នាំមុន ដោយក្នុងនោះផលពីការចិញ្ចឹមលក្ខណៈវារីវប្បកម្ម កំពុងបំពេញតួនាទីយ៉ាងសំខាន់ក្នុងការផ្គត់ផ្គង់ឱ្យទីផ្សារក្នុងស្រុក ដោយមានកំណើនរហូតដល់ជាង ៣០ ភាគរយ។
ឯកឧត្តមបន្តថា តួលេខនេះបញ្ជាក់យ៉ាងច្បាស់ថា អនុវិស័យវារីវប្បកម្មបាននិងកំពុងបំពេញតួនាទីយ៉ាងសំខាន់ក្នុងការផ្គត់ផ្គង់ឱ្យទីផ្សារក្នុងស្រុកជំនួសឱ្យផលនេសាទដាយត្រី និងផលនេសាទក្នុងដែននេសាទ ស្របតាមបំណងប្រាថ្នារបស់សម្តេចតេជោ គឺត្រូវជំរុញផលិតកម្មស្បៀងតាមរយ:ការចិញ្ចឹមត្រីជាលក្ខណៈគ្រួសារ។
សម្រាប់ផលនេសាទទឹកសាបឆ្នាំនេះ គឺអាចមានកម្រិតទាបជាងឆ្នាំមុនប្រមាណ ១៣ ភាគរយដែលការធ្លាក់ចុះនេះ គឺដោយសារកម្ពស់ទឹកជំនន់ទន្លេមេគង្គស្ថិតក្នុងកម្រិតទាប ហើយតាមលក្ខណៈបច្ចេកទេស រួមទាំងវិសាលភាពនៃទឹកជំនន់ក្នុងបឹងទន្លេសាប ការប្រែប្រួលអាកាសធាតុ រដ្ឋបាលជលផលព្យាករថា ផលនេសាទទឹកសាបឆ្នាំនេះអាចទាបជាងឆ្នាំ ២០១៩៕