លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងថា មានពលករខ្មែរម្នាក់ បានឆ្លងជំងឺកូវីដ១៩ នៅក្នុងប្រទេសថៃ។ ពលករខ្មែរនោះស្ថិតក្នុងចំណោមពលករដែលបានធ្វើដំណើរពីខេត្តឈុនបូរី ទៅកាន់ទីក្រុងបាងកក។
លោកជំទាវ បានបញ្ជាក់នៅវេលាម៉ោង១១យប់ ថ្ងៃទី២៤ ខែធ្នូ ម្សិលមិញថា៖ អ្វីដែលខ្ញុំទទួលបានព័ត៌មាន គឺពលករទាំងនេះ គាត់បានចេញពីឈុនបូរី មកបាងកកទេ នៅក្នុងពេលថ្មីៗនេះ ហើយត្រូវបានអាជ្ញាធរថៃ រកឃើញមានកូវីដ-១៩ ម្នាក់។ ដូច្នេះ មិនមែនគាត់មានកូវីដ-១៩ ពីកម្ពុជា រួចហើយបានចូលប្រទេសថៃនោះទេ។ បើតាមព័ត៌មាន ដែលបានផ្តល់មក គឺពួកគាត់ បានចេញទៅថៃ តាំងពីមុនមានហេតុការណ៍ផ្ទុះឡើងនូវការរកឃើញវីរុសកូវីដ-១៩ នៅខេត្តសាមុតសាខន៕
