ភ្នំពេញ៖ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា មិនមានការនាំចូលស៊ុតទាពីប្រទេសជិតខាងទេ ហើយអំពាវនាវឱ្យអាជីវករ អ្នកចិញ្ចឹមសត្វ ជាពិសេសចិញ្ចឹមមាន់ទាយកស៊ុត បើបានដឹងព័ត៌មានអំពីការលួចនាំចូលស៊ុតមាន់-ទាពីប្រទេសជិតខាង ត្រូវទាក់ទងមកអគ្គនាយកដ្ឋានសុខភាពសត្វ និងផលិតកម្មសត្វ ដើម្បីមន្ត្រីចុះអន្តរាគមន៍បង្ក្រាបបទល្មើស ឱ្យបានទាន់ពេលវេលា ។
ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានមានប្រសាសន៍ថា ប៉ុន្មានថ្ងៃនេះតម្លៃពងទាចុះថោក ប៉ុន្តែប្រជាពលរដ្ឋមិនបានដឹងថា ពេលនេះគឺជារដូវត្រី ត្រូវហើយ ប្រជាពលរដ្ឋម្នាក់មិនមែនហូបតែពងទារហូតនោះទេ ។
ឯកឧត្តមបានបន្តថា ចំណែកឯសណ្ឋាគារធំៗមិនដំណើរការ ហើយពិធីធំៗត្រូវបិទ ដូច្នេះស៊ុតទាក៏មិនសូវមានតម្រូវការដែរ ដូច្នេះបានធ្វើឱ្យតម្លៃស៊ុតទាចុះថោក ប៉ុន្តែគ្មានករណីការនាំចូលស៊ុតទាមកពីក្រៅប្រទេសទេ។
ការបំភ្លឺដូច្នេះ គឺដើម្បីឆ្លើយតបទៅនឹងការលើកឡើងរបស់អ្នកចិញ្ចឹមទាយកស៊ុតមួយចំនួនបានលើកឡើងថា មានការបើកឱ្យនាំចូលស៊ុត ពីប្រទេសជិតខាង ដែលធ្វើឱ្យតម្លៃស៊ុតធ្លាក់ថ្លៃលក់ចេញក្រោម៣០០រៀល ក្នុង១គ្រាប់។ឯកឧត្តមបានបញ្ជាក់ថា តាមរបាយការណ៍ មិនមានការអនុញ្ញាតឱ្យនាំចូលស៊ុតនោះទេ ហើយក្នុងករណី
មាន បើឃើញជាក់ស្តែងគឺរាយការណ៍ជាបន្ទាន់ តាមរយៈលេខទូរសព្ទរបស់អគ្គនាយកដ្ឋានសុខភាពនិងផលិតកម្មសត្វ គឺ នឹងចាប់ហើយសួរនាំពីការអនុញ្ញាតឱ្យនាំចូល តើអង្គភាពណាឬពីក្រសួងណា ?ដើម្បីការពារផលប្រយោជន៍របស់កសិករចិញ្ចឹម។
ឯកឧត្តមរដ្ឋមន្ត្រីបញ្ជាក់ថា ក្រោយពីទទួលបានដំណឹងពីការត្អូញត្អែរ ចូលក្នុងហ្វេសបុកផ្ទាល់របស់ខ្ញុំ ខ្ញុំបានបញ្ជាឱ្យឯកឧត្តមអគ្គនាយក នៃអគ្គនាយដ្ឋាន សុខភាព និងផលិតកម្មសត្វធ្វើការស្រាវជ្រាវជាបន្ទាន់ អំពីតម្លៃពងទានៅប្រទេសវៀតណាម ហើយពងទានៅកម្ពុជា គឺតម្លៃដូចគ្នាប្រហាក់ប្រហែលគ្នា ហើយគេអាចថ្លៃជាងយើងផង ។ ជាអ្វីដែលយើងបានមើលឃើញថា មិនមានបាតុភាពការនាំចូលទេ ។
ទន្ទឹមនឹងនោះ អគ្គនាយដ្ឋានបានប្រកាសជូនថា ក្នុងករណីប្រជាជនណាពិនិត្យឃើញថាមានការនាំចូលដោយខុសច្បាប់ត្រូវរាយការណ៍ជាបន្ទាន់មកអគ្គនាយដ្ឋានសុខភាពនិងផលិតកម្មសត្វហើយនឹងបានដាក់លេខទូរស័ព្ទក្នុងសេចក្តីប្រកាសព័ត៌មានរួចជាស្រេចបើមានអ្នកណាឃើញថានាំចូលមកខុសច្បាប់គឺមន្ត្រីអគ្គនាយដ្ឋានសុខភាពនិងផលិតកម្មសត្វគឺទៅចាប់តែម្តង ។ ព្រោះកន្លងទៅអគ្គនាយដ្ឋានសុខភាពនិងផលិតកម្មសត្វមិនដែលអនុញ្ញាតឱ្យបុគ្គលណាឬឈ្មួញណានាំចូលស៊ុតពីប្រទេសវៀតណាមនោះទេ » ។
ឯកឧត្តមបានបញ្ជាក់ថា កម្ពុជាមានសេចក្តីត្រូវការម្ហូបអាហារគឺមានទំហំល្មម បើសិនជាជំរុញការផលិតច្រើននោះនឹងគ្មានទីផ្សារ ដូចបរិបទមួយរយៈនេះមិនមែនតែ ត្រីនិងស៊ុតនោះទេ សូម្បីតែបន្លែក៏មានបញ្ហាផងដែរ ។
ឯកឧត្តមឱ្យដឹងទៀតថា ណាមួយនៅពេលដែលរដូវត្រជាក់មកគឺអ្វីសុទ្ធតែល្អទាំងអស់ ដូចជាការចិញ្ចឹមសត្វល្អមិនសូវមានការកើតជំងឺ ត្រីក៏សម្បូរ ចំណែកឯបន្លែក៏ល្អដូចគ្នាមិនសូវមានដង្កូវនិងសត្វចង្រៃ ដូច្នេះធ្វើឱ្យជន់ជោរ ខណៈដែលប្រជាពលរដ្ឋមិនមានភ្ជាប់ទំនាក់ទំនងជាមួយនឹងគម្រោងកម្មវិធី ពួកគាត់ចេះតែនឹងឃើញគាត់ធ្វើឱ្យផលិតផលកសិកម្មទាំងអស់ជន់ជោរ ធ្វើឱ្យតម្លៃចុះថោកមិនមានទីផ្សារ ។
សូមបញ្ជាក់ថា កាលពីថ្ងៃទី២១ ខែធ្នូ អគ្គនាយកដ្ឋានសុខភាពសត្វនិងផលិតកម្មសត្វ ជម្រាបជូនសាធារណជនថា ក្នុងករណីអាជីវករ អ្នកចិញ្ចឹមសត្វ ជាពិសេសអ្នកចិញ្ចឹមមាន់-ទាយកស៊ុត បានដឹងព័ត៌មានពីការលួចនាំចូលស៊ុតមាន់-ទាពីប្រទេសជិតខាង សូមទំនាក់ទំនងមកអគ្គនាយកដ្ឋានសុខភាពសត្វ និងផលិតកម្មសត្វតាមរយៈទូរស័ព្ទលេខ ០១២ ៨២៨ ២០៩ ដើម្បីចុះអន្តរាគមន៍បង្ក្រាបបទល្មើសចលនាសត្វ និងផលិតផលសត្វស្របតាមច្បាប់ស្តីពីសុខភាពសត្វ និងផលិតកម្មសត្វ ៕
អត្ថបទ៖ ក្រសួងព័ត៌មាន
