ក្រុមសិស្សសាលាថៃដែលមានឈ្មោះថាក្រុម “Bad Student” កាលពីពេលថ្មីៗកន្លងទៅនេះបានប្រមូលផ្តុំគ្នាសាជាថ្មីម្តងទៀតនៅមុខក្រសួងអប់រំថៃ ដើម្បីធ្វើការទាមទារឲ្យក្រសួងលុបចោលនូវបទបញ្ជាដែលតម្រូវឲ្យក្រុមកូនសិស្សត្រូវតែពាក់ឯកសណ្ឋានពេលទៅសាលារៀន។ ការប្រមូលផ្តុំគ្នាលើកនេះត្រូវបានធ្វើឡើងនៅក្នុងម៉ោង ៤ ល្ងាចតាំងពីដើមខែធ្នូ នៅបរិវេណមុខក្រសួងអប់រំក្នុងទីក្រុងបាងកក ដោយមានការចូលរួមពីសំណាក់កូនសិស្សថ្នាក់វិទ្យាល័យរាប់រយនាក់ នេះបើយោងតាមការចុះផ្សាយនៅក្នុងសារព័ត៌មាន បាងកកប៉ុស្តិ៍។
ប្រភពខាងលើបានបន្តថា ការប្រមូលផ្តុំគ្នារបស់ក្រុមសិស្សសាលានេះត្រូវបានធ្វើឡើងដោយស្របច្បាប់ ដោយពួកគេបានស្នើសុំការអនុញ្ញាតពីការិយាល័យប៉ូលិសក្រុងយ៉ាងត្រឹមត្រូវតាមច្បាប់នៃការធ្វើបាតុកម្ម។
ក្នុងពេលធ្វើការតវ៉ានោះក្រុមសិស្សសាលាថែមទាំងបានយកឯកសណ្ឋានកូនសិស្ស និងក្រណាត់ចម្រុះពណ៌ទៅព្យួរតាមរបងក្រសួងអប់រំទៀតផង ដើម្បីបង្ហាញពីគោលបំណងតែមួយគត់របស់ពួកគេ គឺការអនុញ្ញាតឲ្យពួកគេស្លៀកពាក់ដោយសេរីពេលទៅសាលារៀន។
លោក Niphon Kongveha ដែលជាជំនួយការនៃគណៈកម្មការអប់រំមូលដ្ឋានថៃនិងជាអ្នកតំណាងឲ្យក្រសួងអប់រំថៃនោះបានឲ្យដឹងថា របាយការណ៍ចុងក្រោយដែលក្រសួងទទួលបានគឺមានកូនសិស្សចំនួន ៥៨០ នាក់នៅទូទាំងប្រទេសដែលបានទាមទារឲ្យលុបចោលការស្លៀកពាក់ឯកសណ្ឋាន ហើយចំនួននេះនៅមិនទាន់អាចបង្ហាញពីមតិភាគច្រើននៅឡើយទេ បើធៀបទៅនឹងចំនួនកូនសិស្សសរុប។
យ៉ាងណាក្តីលោកបានបន្តថា រហូតមកទល់នឹងពេលនេះខាងក្រសួងនៅមិនទាន់អនុវត្តវិធានការតឹងរឹងណាមួយចំពោះការស្លៀកពាក់ឯកសណ្ឋាននោះទេ ដោយសាលាទាំងអស់នៅតែបើកទ្វារទទួលសិស្សទាំងអស់ដោយមិនប្រកាន់លើការស្លៀកពាក់របស់ពួកគេឡើយ៕