កុងតឺន័រចំនួន១,៨១៦ទូ នៅលើកប៉ាល់ដឹកទំនិញមួយគ្រឿង ត្រូវខូចខាត បន្ទាប់ពីកុងតឺន័រធ្លាក់ពីលើគ្នា មានខ្លះធ្លាក់ចូលសមុទ្រ ដោយសារព្យុះវាយប្រហារ អំឡុងពេលធ្វើដំណើរទៅប្រទេសជប៉ុន។ នេះជាអ្វីដែលត្រូវបានគេជឿថា ជាការខាតបង់ទំនិញធំបំផុតទាក់ទងនឹងអាកាសធាតុនៅក្នុងប្រវត្តិសាស្ត្រ។ នេះបើតាមការចេញផ្សាយដោយសារព័ត៌មាន dailymail កាលពីថ្ងៃទី០៩ ខែធ្នូ ម្សិលមិញ។
កប៉ាល់ដឹកកុងតឺន័រខាងលើ ឈ្មោះ ONE Apus បានទៅដល់កំពង់ផែ Kobe ប្រទេសជប៉ុន កាលពីថ្ងៃអង្គារ បន្ទាប់ពីធ្វើដំណើរអស់រយៈពេល៨ថ្ងៃ ពីកណ្តាលមហាសមុទ្រប៉ាស៊ីហ្វិក។
យ៉ាងណាក៏ដោយ បច្ចុប្បន្ននេះ ការវាយតម្លៃសុវត្ថិភាពពេញលេញកំពុងធ្វើឡើងដើម្បីរកឲ្យឃើញថាតើមានទំហំខូចខាតប៉ុនណា។
សូមជម្រាបថា ព្យុះបានបោកបក់នៅកណ្តាលមហាសមុទ្រប៉ាស៊ីហ្វិក ធ្វើឱ្យកុងតឺន័រខូចខាត នឹងធ្លាក់ទៅក្នុងទឹកសមុទ្រ នៅចម្ងាយ២,៩៦៣គីឡូម៉ែត្រ ភាគពាយព្យនៃកោះហាវ៉ៃ។
កុងតឺន័រដឹកទំនិញ ដែលខូចខាត មានដូចជាកុងតឺន័រផ្ទុកកាំជ្រួច ៥៤ទូ ផ្ទុកអាគុយ៨ទូ និងផ្ទុកអេតាណុលរាវចំនួន២ទូ៕