(ភ្នំពេញ)៖ ក្រសួងសុខាភិបាល បានប្រកាសនៅព្រឹកថ្ងៃទី៨ ខែធ្នូនេះថា មានអ្នកឆ្លងវីរុសកូវីដ១៩ថ្មី ចំនួន ២នាក់ទៀត ជាអ្នកពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា។ នោះគឺបុរសជនជាតិខ្មែរ ឈ្មោះ ស្រៀន គីមស្រ៊ុន អាយុ ២២ឆ្នាំ មានអាសយដ្ឋាន ស្នាក់នៅសង្កាត់វត្តភ្នំ ខណ្ឌដូនពេញ រាជធានីភ្នំពេញ។ បុរសនេះ ជានិស្សិតច្បាប់ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានទៅហាង Zendo បឹងកេងកង នៅថ្ងៃទី២៧ ខែវិច្ឆិកា ឆ្នាំ២០២០។ រីឯម្នាក់ទៀត ជាស្ត្រីជនជាតិខ្មែរ ឈ្មោះ អៀម ធីតា អាយុ ៣៥ឆ្នាំ មានអាសយដ្ឋាន ស្នាក់នៅសង្កាត់បឹងទំពន់ ខណ្ឌមានជ័យ រាជធានីភ្នំពេញ បានទៅហាង Pedro នៅថ្ងៃទី២៧ ខែវិច្ឆិកា ឆ្នាំ២០២០។
ក្រសួងសុខាភិបាល បានប្រកាសថា កាលពីថ្ងៃទី៧ ខែធ្នូ ឆ្នាំ២០២០ វត្ថុសំណាក ដែលនៅសល់ថ្ងៃទី៦ ខែធ្នូ ឆ្នាំ២០២០ មានចំនួន ២២៨សំណាក បូកបន្ថែមចំនួនវត្ថុសំណាក ទទួលបានបន្ថែមនៅថ្ងៃទី៦ធ្នូ មកពីខេត្ត និងរាជធានីភ្នំពេញ ដែលជាថ្ងៃធ្វើតេស្តលើកទី២ សម្រាប់ព្រឹត្តិការណ៍សហគមន៍២៨វិច្ឆិកា សរុបមានចំនួន ២៤៨៣សំណាក ត្រូវបានធ្វើតេស្តវិភាគ ដោយវិទ្យាស្ថានប៉ាស្ទ័រកម្ពុជា គឺមានលទ្ធផលវិជ្ជមានវីរុសកូវីដ១៩ថ្មី ចំនួន ២នាក់ ដែលជាអ្នកជំងឺខាងលើនេះ។ ដោយឡែក មាននៅសល់វត្ថុសំណាក ចំនួន ១៦០៥សំណាកផ្សេងទៀត ដែលត្រូវវិភាគបន្ត នៅថ្ងៃទី០៨ ខែធ្នូ ឆ្នាំ២០២០។
ក្រសួងសុខាភិបាល បានប្រកាសឲ្យអ្នកប៉ះពាល់ទៅនឹងព្រឹត្តិការណ៍សហគមន៍២៨វិច្ឆិកា ទាំងអស់ អញ្ជើញទៅធ្វើតេស្តជាលើកទី២ នៅថ្ងៃទី៨ ខែធ្នូ ឆ្នាំ២០២០ ដែលក្រសួងសុខាភិបាល រៀបចំទីតាំងនៅបរិវេណពហុកីឡដ្ឋានជាតិអូឡាំពិក រាជធានីភ្នំពេញ និងនៅតាមមន្ទីរសុខាភិបាលខេត្ត ( ដែលទទួលខុសត្រូវក្នុងការរៀបចំទីកន្លែងនៅពេលនោះ សម្រាប់អ្នកពាក់ព័ន្ធនៅតាមខេត្ត )។
សូមរម្លឹកថា ព្រឹត្តិការណ៍សហគមន៍ថ្ងៃ២៨វិច្ឆិកា គិតមកដល់ព្រឹកថ្ងៃទី៨ ខែធ្នូ ឆ្នាំ២០២០ មានអ្នកឆ្លងសរុប ៣៤នាក់។ រីឯអ្នកធ្វើតេស្តរកមេរោគកូវីដ១៩ មានចំនួនជាង ១ម៉ឺននាក់ហើយ។
ទន្ទឹមនឹងមានអ្នកឆ្លងកូវីដថ្មី២នាក់ កាលពីថ្ងៃទី៧ ខែធ្នូម្សិលមិញ ក្រសួងសុខាភិបាល ក៏បានប្រកាសថា មានអ្នកជាសះស្បើយម្នាក់។ នោះគឺស្ត្រីជនជាតិខ្មែរ-អាមេរិកកាំង ឈ្មោះ ឈួយ សារូ អាយុ ៤៥ឆ្នាំ មានអាសយដ្ឋាន ស្នាក់នៅក្រុងប៉ៃលិន ខេត្តប៉ៃលិន ធ្វើដំណើរមកពីសហរដ្ឋអាមេរិក បន្តជើងហោះហើរ នៅប្រទេសកូរ៉េខាងត្បូង មកដល់កម្ពុជា នៅថ្ងៃទី២៧ ខែវិច្ឆិកា ឆ្នាំ២០២០។
ក្រសួងសុខាភិបាល បានប្រកាសថា គិតត្រឹមម៉ោង ៧ព្រឹក ថ្ងៃទី៨ ខែធ្នូ ឆ្នាំ២០២០ ស្ថានភាពជំងឺកូវីដ១៩ នៅកម្ពុជា គឺរកឃើញអ្នកឆ្លង សរុបចំនួន ៣៥០នាក់។ ក្នុងនោះ ៣០៧នាក់ ត្រូវបានព្យាបាលជាសះស្បើយ និង៤៣នាក់ កំពុងសម្រាកព្យាបាលនៅមន្ទីរពេទ្យរដ្ឋ ( ៣៣នាក់ នៅមន្ទីរពេទ្យមិត្តភាពខ្មែរ-សូវៀត និង ១០នាក់ នៅមណ្ឌលសុខភាពចាក់អង្រែ រាជធានីភ្នំពេញ )៕