(ភ្នំពេញ)៖ អាជ្ញាធររាជធានីភ្នំពេញ សហការជាមួយក្រសួងសុខាភិបាល បានសម្រេចជ្រើសរើសយកទីតាំងពហុកីឡដ្ឋានជាតិអូឡាំពិក ធ្វើជាកន្ដែង សម្រាប់យកសំណាក លើកទី២ សម្រាប់ប្រជាពលរដ្ឋ ដែលសង្ស័យថា មានជំងឺកូវីដ១៩ ក្នុងព្រឹត្តិការណ៍សហគមន៍ ២៨វិច្ឆិកា។ ការពិនិត្យយកសំណាក លើកទី២ នឹងធ្វើឡើង នៅថ្ងៃទី០៨ធ្នូខាងមុខនេះ។
ដើម្បីរៀបចំទីតាំងថ្មីខាងលើនេះ ឲ្យដំណើរការទៅបានរលូន លោក ឃួង ស្រេង អភិបាលរាជធានីភ្នំពេញ និងលោកស្រី យក់ សម្បត្តិ រដ្ឋលេខាធិការក្រសួងសុខាភិបាល កាលពីល្ងាចថ្ងៃទី០៣ធ្នូនេះ បានដឹកនាំមន្ត្រី និងអាជ្ញាធរ ចុះពិនិត្យទីតាំង នៅស្តាតអូឡាំពិក ដោយបានណែនាំអាជ្ញាធរសមត្ថកិច្ច ឲ្យរៀបចំសណ្ដាប់ធ្នាប់ រៀបចំណតសម្រាប់បងប្អូនប្រជាពលរដ្ឋ ដែលត្រូវមកពិនិត្យ យកសំណាក ជាលើកទី២ និងការរៀបចំរោង បំពាក់ដោយម៉ាស៊ីនត្រជាក់ និងបង្គន់អនាម័យផងដែរ។
ឯកឧត្តម ឃួង ស្រេង អភិបាលរាជធានីភ្នំពេញ បានណែនាំ ឲ្យចាត់កម្លាំងអាជ្ញាធរ និងកម្លាំងពាក់ព័ន្ធ ប្រមាណ ៥០នាក់ ដើម្បីជួយទៅលើការរៀបចំសណ្តាប់ធ្នាប់ សន្តិសុខពីខាងក្នុង និងក្រៅពហុកីឡដ្ឋានជាតិអូឡាំពិក៕