យោងតាមបណ្ដាញទំនាក់ទំនងសង្គម « ហ្វេសប៊ុក » ផ្លូវការរបស់លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប នៅព្រឹកថ្ងៃទី០២ ខែធ្នូ ឆ្នាំ២០២០នេះ បានសរសេរថា បន្ទាប់ពីបានយកសំណាកអ្នកពាក់ព័ន្ធព្រឹត្តិការណ៍សហគមន៍ ២៨វិច្ឆិកា ក្នុងខេត្តសៀមរាប មកធ្វើតេស្ដចំនួន១៧២នាក់ ក្នុងនោះស្រីចំនួន៤៥នាក់ នាថ្ងៃទី៣០ ខែវិច្ឆិកានេះ លទ្ធផលគឺអវិជ្ជមានទាំងអស់ ហើយលោកទទូចឲ្យមានការបន្តធ្វើច័ត្តាឡីស័ក ក្នុងរយៈពេល១៤ថ្ងៃ ឲ្យបានខ្ជាប់ខ្ជួន ត្រឹមត្រូវ និងហ្មត់ចត់ តាមគោលការណ៍ណែនាំរបស់ក្រសួងសុខាភិបាល ។
សូមបញ្ជាក់ថា ក្នុងរយៈពេល២ថ្ងៃ គឺថ្ងៃទី២៩ និង ថ្ងៃទី៣០ ខែវិច្ឆិកា សម្រាប់អ្នកពាក់ព័ន្ធព្រឹត្តិការណ៍សហគមន៍២៨វិច្ឆិកា ក្នុងខេត្តសៀមរាប ចំនួន៣៦៤នាក់ ដែលបានយកសំណាកមកធ្វើតេស្ដរកមេរោគកូវីដ១៩ ហើយលទ្ធផល គឺអវិជ្ជមានទាំងអស់ ។
យោងតាមសេចក្តីជូនព័ត៌មាន របស់ក្រសួងសុខាភិបាល នៅព្រឹកថ្ងៃទី០៣ ខែធ្នូ ឆ្នាំ២០២០នេះ បានបញ្ជាក់ថា គ្មានការរកឃើញអ្នកឆ្លងជំងឺកូវីដ១៩ ដែលពាក់ព័ន្ធនឹងព្រឹត្តិការណ៍ «សហគមន៍២៨ខែវិច្ឆិកា» ទេ ប៉ុន្តែរកឃើញមានអ្នកឆ្លងជំងឺកូវីដ១៩ ថ្មីចំនួន៣នាក់ ដែលជាអ្នកធ្វើដំណើរមកពីក្រៅប្រទេស ។
នៅថ្ងៃទី០១ ខែធ្នូ ឆ្នាំ២០២០ ក្រសួងសុខាភិបាល បានយកវត្ថុសំណាកពីអ្នកពាក់ព័ន្ធទៅនឹងព្រឹត្តិការណ៍សហគមន៍ ២៨វិច្ឆិកា បានចំនួន ២.០៤២នាក់ បន្ថែមទៀត ហើយបើគិតទាំងចំនួនដែលនៅសល់ពីថ្ងៃមុនៗ ដែលត្រូវយកមកវិភាគនៅថ្ងៃជាបន្តបន្ទាប់នោះ គឺមានវត្ថុសំណាកសរុបចំនួន ៣.៩៩៨នាក់ ដែលនៅក្នុងចំនួននេះ វត្ថុសំណាកចំនួន ២.៩១៧ នាក់ បានធ្វើវិភាគនៅថ្ងៃទី០១ ខែធ្នូ ឆ្នាំ២០២០ ដោយបានផ្តល់លទ្ធផលពីវិទ្យាស្ថានប៉ាស្ទ័រកម្ពុជាត្រឹមម៉ោង២៣:៣០នាទី យប់នៃថ្ងៃទី០១ ខែធ្នូ ឆ្នាំ២០២០ គឺ អវិជ្ជមានវីរុសកូវីដ-១៩ ទាំងអស់៕ #មន្ទីរព័ត៌មានខេត្តសៀមរាប
