ក្រសួងសុខាភិបាល បានប្រកាសថា ការធ្វើតេស្តលើអ្នកប៉ះពាល់ក្នុងព្រឹត្តិការណ៍សហគមន៍ ២៨វិច្ឆិកា នៅថ្ងៃទី២៩-៣០ ខែវិច្ឆិកា មានចំនួន ៤៨៦៩នាក់ ដែលនៅក្នុងចំនួននេះ លទ្ធផលតេស្តបានបង្ហាញថា មានអ្នកវិជ្ជមានវីរុសកូវីដ១៩ ថ្មី សរុបចំនួន ១៧នាក់ ( ថ្ងៃទី២៨វិច្ឆិកា ចំនួន ៦នាក់ ថ្ងៃទី២៩វិច្ឆិកា ចំនួន ៨នាក់ និងថ្ងៃទី៣០វិច្ឆិកា ចំនួន ៣នាក់ )។
តាមសេចក្តីប្រកាស អ្នកឆ្លងថ្មីវីរុសកូវីដ១៩ ចំនួន ៣នាក់ នៅក្នុងព្រឹត្តិការណ៍សហគមន៍២៨វិច្ឆិកា គឺជាស្ត្រីជនជាតិខ្មែរ អាយុ ៦៤ឆ្នាំ មានអាសយដ្ឋានស្នាក់នៅសង្កាត់ទួលទំពូង១ ខណ្ឌចំការមនរាជធានីភ្នំពេញ ត្រូវជាម្តាយអ្នកជំងឺស្ត្រីអាយុ ៣៦ឆ្នាំ ដែលមានស្វាមីជាអនុប្រធាននាយកដ្ឋានពន្ធនាគារនៃក្រសួងមហាផ្ទៃ។ រីឯ ២នាក់ទៀត ជាម្តាយ អាយុ ២៥ឆ្នាំ និងទារកប្រុស ជនជាតិខ្មែរ អាយុ ៧ខែ មានអាសយដ្ឋាននៅសង្កាត់និរោធ ខណ្ឌច្បារអំពៅ រាជធានីភ្នំពេញ៕